Al Monitor. Ռիադը մտադիր է կոալիցիա կազմել Կարմիր ծովում նավագնացությունը պաշտպանելու համար

Սաուդյան Արաբիան մտադիր է ստեղծել նոր միջազգային կոալիցիա՝ Կարմիր ծովում նավագնացության անվտանգությունն ապահովելու և Եմենի ապստամբական «Անսար Ալլահ» շարժման հութի ապստամբներից պաշտպանվելու համար, հաղորդում է Al Monitor-ը՝ հղում անելով աղբյուրներին։

Աղբյուրների համաձայն՝ Էր-Ռիադը հույս ունի կոալիցիային ներգրավել մոտ 50 երկիր։ Եգիպտոսը, Սուդանը, Ջիբուտին և Սոմալին արդեն իսկ համաձայնություն են հայտնել միանալ սաուդյան նախաձեռնությանը։ Հրավերներ են ուղարկվել նաև Թուրքիային, Կատարին, Բահրեյնին, Քուվեյթին, Պակիստանին, Բանգլադեշին և մի շարք այլ երկրների։

Կոալիցիայի ստեղծման հիմնական հարցը ԱՄՆ դիրքորոշումն է։ Al Monitor-ի աղբյուրները նշում են, որ Վաշինգտոնը նույնպես հրավեր է ստացել միանալու կոալիցիային։ Պորտալի տվյալներով՝ Իրանի հետ սրվող հակամարտության պատճառով ԱՄՆ-ն կարող է հրաժարվել հութիների դեմ պայքարին մասնակցելուց։ Մի շարք եվրոպական երկրներ, այդ թվում՝ Ֆրանսիան, Գերմանիան և Իտալիան, քննարկում են կոալիցիային միանալու հնարավորությունը, եթե Միացյալ Նահանգները միանա։ «Բոլորը սպասում են, որ ԱՄՆ-ն որոշում կկայացնի։ Առանց իրական ռեսուրսների այս նախաձեռնությունը առաջ չի շարժվի», - ասել է աղբյուրներից մեկը։

Սաուդյան Արաբիան, ինչպես նշում է պորտալը, ակնկալում է, որ կոալիցիան կկենտրոնանա ոչ միայն հութիների դեմ պայքարի, այլև Կարմիր ծովում ծովահենության և մաքսանենգության դեմ պայքարի վրա։