Բնության գրկում հանգստանալիս պահպանեք անվտանգության այս կանոնները. Առողջապահության նախարարություն

Ամառային հանգստի ընթացքում բնության գրկում ժամանակ անցկացնելիս անհրաժեշտ է պահպանել մի շարք պարզ կանոններ՝ առողջական խնդիրներից խուսափելու և անվտանգ հանգիստն ապահովելու համար։

Առաջին հերթին խորհուրդ է տրվում պաշտպանվել միջատներից, որոնք կարող են վարակիչ հիվանդությունների փոխանցման աղբյուր լինել։ Դրա համար կարելի է օգտագործել միջատներին վանող միջոցներ և կրել բաց գույնի, երկարաթև ու թեթև հագուստ։

Հատուկ ուշադրություն պետք է դարձնել նաև սննդամթերքի պահպանմանը․ Շուտ փչացող մթերքը տեղափոխել և պահել սառնարան-պայուսակներում։

Չգնել անհայտ ծագման միս, մսամթերք և այլ շուտ փչացող սնունդ այն վայրերից, որոնք նախատեսված չեն առևտրի համար և չունեն համապատասխան փաստաթղթեր։

Խորհուրդ չի տրվում բնության գրկում վերցնել կաթնամթերք, ապխտած մթերք, ձու և կրեմային հրուշակեղեն, քանի որ դրանք նպաստավոր պայմաններ են ստեղծում մանրէների բազմացման համար։

Խմելու համար օգտագործել միայն շշալցված ջուր և չօգտվել պատահական ջրաղբյուրներից։

Հում և պատրաստի մթերքի համար օգտագործել առանձին դանակներ, ափսեներ և կտրատման տախտակներ։ Կարևոր է նաև թույլ չտալ, որ հում մսից կամ այլ մթերքից արտահոսող հեղուկը շփվի պատրաստի սննդի, մրգերի ու բանջարեղենի հետ։

Սնունդը պաշտպանել միջատներից, կրծողներից և այլ կենդանիներից՝ այն պահելով փակվող տարաներում կամ փաթեթավորելով սննդային թաղանթով կամ փայլաթիթեղով։

Սնունդը, այդ թվում՝ խորովածը, պատրաստել ուտելուց անմիջապես առաջ։ Միսը պետք է լիարժեք ջերմային մշակման ենթարկել և օգտագործելուց առաջ համոզվել, որ այն ամբողջությամբ եփված է։

Պահպանել անձնական հիգիենայի կանոնները՝ սնունդ պատրաստելուց և ուտելուց առաջ ձեռքերը լվանալ օճառով։

Ձեռքերը, սպասքը, մրգերն ու բանջարեղենը լվանալ միայն խմելու համար նախատեսված կամ շշալցված ջրով։