Իսպանիան փակել է Մարոկկոյի հետ սահմանային անցակետը

Իսպանիայի իշխանությունները փակել են Մարոկկոյի հետ սահմանին գտնվող Մելիլիա ինքնավար քաղաքի միակ սահմանային անցակետը՝ Բենի Էնզարը, այն բանից հետո, երբ հարյուրավոր միգրանտներ փորձել են հատել սահմանը։ Այս մասին հայտնում է El Pais-ը՝ հղում անելով տեղական իշխանություններին։

Քաղաքի վարչակազմը բնակիչներին կոչ է արել չմոտենալ սահմանային գոտուն, որպեսզի չխոչընդոտեն անվտանգության ուժերի աշխատանքը։

EFE-ի տվյալներով՝ սահմանի շրջանում նաև կրակոցներ են լսվել։

Միգրանտները Մելիլիայի սահմանը սկսել են գրոհել հինգշաբթի գիշերը՝ փորձելով Իսպանիա հասնել ինչպես ցամաքային, այնպես էլ ծովային ճանապարհով։ Մելիլիայի նախագահ Խուան Խոսե Իմբրոդայի խոսքով՝ հաջողվել մուտք գործել շուրջ 300-400 միգրանտի։

Միաժամանակ ավելի լուրջ միգրացիոն ճգնաժամ է զարգանում Իսպանիայի մեկ այլ հյուսիսաֆրիկյան անկլավում՝ Սեուտայում։ TVE-ի փոխանցմամբ՝ այնտեղ սահմանը հատել է մոտ 2-3 հազար մարդ։ Հայտնի է նաև առնվազն 18 զոհված միգրանտի մասին, որոնց մարմինները ծովը դուրս է բերել ափ։ Իսպանիայի իշխանությունները Սեուտա են ուղարկել նաև ցամաքային զորքերի ստորաբաժանումներ։

Լրատվամիջոցների փոխանցմամբ՝ իրավիճակը սրվել է Իսպանիայի Գերագույն դատարանի որոշումից հետո, որով արգելվել է ծովում հայտնաբերված և անկլավներ հասնելու փորձ կատարող միգրանտների արագ արտաքսումը։ Այս ֆոնին ընդդիմադիր Ժողովրդական կուսակցության ներկայացուցիչները քննադատել են վարչապետ Պեդրո Սանչեսի կառավարությանը՝ այն մեղադրելով միգրացիոն ճգնաժամը խորացնելու մեջ։