Reuters․ Դուբայում գործող կրիպտոբորսան, ըստ հետաքննության, օգնել է Իրանին շրջանցել պատժամիջոցները

Reuters-ի հետաքննության համաձայն՝ Դուբայում գործող Shelbit անվամբ չլիցենզավորված կրիպտոբորսան դարձել է իրանական խոշոր ֆինանսական ցանցի առանցքային օղակը, որի միջոցով, ըստ հրապարակման, շրջանցվել են միջազգային պատժամիջոցները։ Հետաքննության հեղինակների գնահատմամբ՝ 2024 թվականի մայիսից ի վեր հարթակի միջոցով իրականացվել է առնվազն 4 միլիարդ դոլարի կրիպտոարժութային շրջանառություն։

Հետաքննության մեջ նշվում է, որ Shelbit-ը համագործակցել է պարսկերեն լեզվով գործող ավելի քան 2 000 առցանց խաղադրույքների կայքերից բաղկացած ցանցի հետ, որը գովազդել են իրանցի հայտնի ինֆլյուենսերներ։ Reuters-ը, հղում անելով բլոկչեյնի վերլուծաբաններին և կիբերանվտանգության մասնագետներին, գրում է, որ կրիպտոարժույթների մի մասը փոխանցվել է նաև խոշոր միջազգային հարթակներ, այդ թվում՝ Binance։ Միևնույն ժամանակ Binance-ը հայտարարել է, որ Shelbit-ի հետ կապված հաշիվների նկատմամբ իրականացրել է համապատասխան ստուգումներ, սառեցրել է անհրաժեշտ հաշիվները և տեղեկացրել իրավապահ մարմիններին։

Reuters-ի տվյալներով՝ Դուբայի վիրտուալ ակտիվների կարգավորող մարմինը (VARA) դեռևս 2025 թվականին միջոցներ է ձեռնարկել Shelbit-ի դեմ՝ առանց լիցենզիայի գործունեություն իրականացնելու համար, իսկ 2026 թվականի հուլիսին ընկերությանը կարգադրել է անհապաղ դադարեցնել գործունեությունը։ Իրանական իշխանությունները և Shelbit-ի հիմնադիր Սիավաշ Քայվանփուրը Reuters-ի հարցումներին չեն պատասխանել, իսկ հրապարակման մեջ ներկայացված մի շարք պնդումներ հիմնված են հետաքննության ընթացքում հավաքագրված աղբյուրների, փորձագետների գնահատականների և բլոկչեյն տվյալների վերլուծության վրա։