Թրամփը մերժել է Զելենսկու՝ Patriot-ի 300 հրթիռ տրամադրելու խնդրանքը․ The Atlantic

ԱՄՆ նախագահ Դոնալդ Թրամփը մերժել է Ուկրաինայի նախագահ Վլադիմիր Զելենսկու խնդրանքը՝ Կիևին տրամադրել Patriot համակարգերի 300 հակահրթիռ՝ ձմռանն սպասվող բալիստիկ սպառնալիքներին դիմակայելու համար։ Այս մասին հաղորդում է The Atlantic-ը՝ հղում անելով բանակցություններին ծանոթ աղբյուրներին։

Պարբերականի տվյալներով՝ ուկրաինական կողմը 300 հակահրթիռ էր խնդրել էներգետիկ ենթակառուցվածքները պաշտպանելու և ձմռան ամիսներին հնարավոր հարձակումները հետ մղելու նպատակով, սակայն Թրամփը չի աջակցել այդ խնդրանքին։

Պատրաստի հակահրթիռներ մատակարարելու փոխարեն ԱՄՆ նախագահն առաջարկել է Ուկրաինային տրամադրել Patriot-ի հակահրթիռների սեփական արտադրություն կազմակերպելու արտոնագիր։ Միաժամանակ նշվում է, որ Կիևը դեռ երկար տարիներ չի կարողանա դրանց սերիական արտադրություն սկսել։

The Atlantic-ը նաև գրում է, որ Թրամփի հետ հանդիպման ժամանակ Զելենսկին խնդրել է թույլատրել Starlink արբանյակային ցանցի օգտագործումը Ռուսաստանի տարածքին հարվածներ հասցնելու նպատակով։ Նրա խոսքով՝ դա անհրաժեշտ է փոքր և շարժական թիրախները, մասնավորապես՝ բալիստիկ հրթիռների մարտկոցները խոցելու համար։

Խնդրանքը հնչել է հուլիսի 28-ին Սպիտակ տանն անցկացված բանակցությունների՝ լրագրողների համար փակ հատվածում։ Աղբյուրների համաձայն՝ Թրամփը հստակ պատասխան չի տվել՝ նշելով, որ կուսումնասիրի հարցը։

Հուլիսի 31-ին Financial Times-ին տված հարցազրույցում Թրամփը հայտարարել է, որ դեռ չի որոշել՝ արդյոք Վաշինգտոնը Կիևին կտրամադրի Patriot-ի հրթիռների արտադրության արտոնագիր, սակայն նման հնարավորությունը քննարկվում է։

Հուլիսի 29-ին Axios-ին տված հարցազրույցում Զելենսկին հրապարակայնորեն խնդրել էր Թրամփին տրամադրել 300 Patriot հակահրթիռ։ Նա նաև հայտնել էր, որ ուկրաինական կողմն ամերիկյան ռազմարդյունաբերական ընկերությունների հետ քննարկում է ուկրաինական արտադրության բալիստիկ հրթիռները Patriot-ին համադրելի հակահրթիռների վերափոխելու հնարավորությունը։