ՆԳ նախարարությունում քննարկվել են հանցավորության դեմ պայքարի արդյունավետության բարձրացման հարցերը

ՆԳ նախարարի տեղակալ Արմեն Մկրտչյանի գլխավորությամբ հուլիսի 30-ին տեղի է ունեցել աշխատանքային քննարկում։ Մասնակցում էին ՆԳ նախարարության, Ոստիկանության և Գլխավոր դատախազության տարբեր ստորաբաժանումների ղեկավարներ։

Քննարկման առանցքում հանցավորության դեմ պայքարի ոլորտում շահագրգիռ գերատեսչությունների միջև համագործակցության արդյունավետության բարձրացմանը, իրավապահ մարմինների գործունեության համակարգմանն ու առկա խնդիրների լուծմանն ուղղված հարցերն էին։

Մասնավորապես, անդրադարձ է կատարվել արձանագրված հանցագործությունների բնույթին, դրանց կատարման առավել տարածված եղանակներին, կազմակերպված հանցավոր խմբերի կողմից կիրառվող մեթոդներին, հանցագործությունների նախապատրաստման և կատարման ընթացքում օգտագործվող տարբեր սխեմաներին, դեպքերի քննության առանձնահատկություններին, ինչպես նաև դրանց կանխման, բացահայտման և ապացուցման գործընթացում ի հայտ եկող գործնական խնդիրներին։

Կարևորվել է Ոստիկանության, նախաքննական մարմինների և Գլխավոր դատախազության միջև համագործակցության առավել արդյունավետ կազմակերպումը, քրեական վարույթների շրջանակում իրականացվող քննչական և օպերատիվ-հետախուզական միջոցառումների պատշաճ համակարգումը, ինչպես նաև միասնական գործելաոճի ձևավորումը։

Քննարկվել է նաև դատավարական փաստաթղթերի պատշաճ կազմման և ապացույցների ամրագրման միասնական պրակտիկայի ձևավորման վերաբերյալ հարցեր։

Անդրադարձ է կատարվել նաև տեսահսկման համակարգերի, տեխնիկական և թվային գործիքների առավել արդյունավետ կիրառմանը, վերլուծական աշխատանքի կատարելագործմանը, հանցավորության միտումների շարունակական ուսումնասիրմանը, ռիսկերի գնահատմանն ու կանխարգելիչ միջոցառումների պլանավորմանը։

Ընդգծվել է օրենսդրական և ենթաօրենսդրական կարգավորումների կատարելագործման հնարավորությունների ուսումնասիրության, ինչպես նաև գործնականում ի հայտ եկող խնդիրների լուծմանն ուղղված առաջարկությունների մշակման կարևորությունը։

Քննարկման ավարտին մասնակիցները պայմանավորվել են ամրապնդել միջգերատեսչական համագործակցությունը, ապահովել ներկայացված առաջարկությունների փուլային իրականացումը և ձեռնարկել անհրաժեշտ միջոցառումներ հանցագործությունների նախականխման, կանխման, խափանման, արագ և լիարժեք բացահայտման, ինչպես նաև իրավապահ մարմինների գործունեության արդյունավետության բարձրացման ուղղությամբ։