Ռուսաստանը զանգվածային հարված է հասցրել Կիևին․ կան զոհեր

Ռուս-ուկրաինական պատերազմի գոտում օգոստոսի 1-ի գիշերը կողմերը զանգվածային օդային հարվածներ են իրականացրել, իսկ նախորդ օրվա ընթացքում ռազմաճակատի տարբեր հատվածներում արձանագրվել է ավելի քան 240 մարտական բախում, ուկրաինական իշխանությունների տվյալներով՝ ռուսական ուժերը բալիստիկ հրթիռներով և անօդաչու թռչող սարքերով հարվածել են Կիևին։

Հարձակման հետևանքով զոհվել է առնվազն 9 մարդ, վիրավորվել՝ շուրջ 30-ը, այդ թվում՝ երեխաներ։ Վնասներ են արձանագրվել Ուկրաինայի մայրաքաղաքի յոթ վարչական շրջաններում, հրդեհներ են բռնկվել բնակելի և ոչ բնակելի շինություններում, որոշ հատվածներում եղել են էլեկտրամատակարարման խափանումներ։

Ուկրաինայի արտակարգ ծառայության տվյալներով՝ Սոլոմյանսկի շրջանում վնասվել և հրդեհվել է հինգհարկանի բնակելի շենք։ Շենքի վերին հարկերից տարհանվել է 35 մարդ։ Դառնիցկի շրջանում հարվածների հետևանքով վնասվել են բնակելի տներ, ավտոմեքենաներ, վարչական և այլ շինություններ։

Ռուսաստանի պաշտպանության նախարարությունը հաստատել է Կիևին և Կիևի մարզին զանգվածային հարված հասցնելու փաստը։ Ռուսական կողմի պնդմամբ՝ թիրախավորվել են Ուկրաինայի ռազմարդյունաբերական ձեռնարկություններ և լոգիստիկ կենտրոններ, որոնք ներգրավված են հրթիռների, անօդաչուների, ռադիոլոկացիոն կայանների և ռադիոէլեկտրոնային պայքարի միջոցների արտադրության, պահպանման ու մատակարարման գործընթացում։

Ռուսաստանի ՊՆ-ն նշել է Կիևում գտնվող մի շարք արտադրական ձեռնարկություններ, ինչպես նաև Կիևի մարզի Վիշնևոյե բնակավայրում գործող լոգիստիկ կենտրոն։ Ուկրաինական կողմը և անկախ աղբյուրները հրապարակման պահին չէին հաստատել Ռուսաստանի ՊՆ-ի ներկայացրած ռազմական օբյեկտների ցանկն ու դրանց վնասման աստիճանը։

Միաժամանակ Ռուսաստանի պաշտպանության նախարարությունը հայտնել է, որ հուլիսի 31-ի ժամը 20։00-ից մինչև օգոստոսի 1-ի ժամը 07։00-ն ռուսական հակաօդային պաշտպանության միջոցները որսացել կամ ոչնչացրել են ինքնաթիռային տիպի 274 ուկրաինական ԱԹՍ։ Ըստ հաղորդագրության՝ անօդաչուները խոցվել են Ռուսաստանի ավելի քան մեկ տասնյակ մարզերի, Մոսկվայի տարածաշրջանի, Կրասնոդարի երկրամասի, Ղրիմի, ինչպես նաև Սև և Ազովի ծովերի ջրային տարածքների երկնքում։ Ուկրաինան այդ թիվը չի հաստատել։

Ուկրաինայի զինված ուժերի գլխավոր շտաբի՝ օգոստոսի 1-ի ժամը 08։00-ի ամփոփագրի համաձայն՝ նախորդ օրվա ընթացքում ռազմաճակատում գրանցվել է 243 մարտական բախում։ Ուկրաինական կողմի տվյալներով՝ առավել ինտենսիվ մարտեր են ընթացել Պոկրովսկի ուղղությամբ, որտեղ արձանագրվել է 37 գրոհ, Կոստյանտինիվկայի ուղղությամբ՝ 26, Սլովյանսկի ուղղությամբ՝ 19, իսկ Հարավային Սլոբոժանշչինայի ուղղությամբ՝ 17։

Ուկրաինայի գլխավոր շտաբը նաև հայտնել է, որ երկրի հրթիռային զորքերն ու հրետանին հարվածել են ռուսական ուժերի անօդաչուների կառավարման երկու կետի, զինծառայողների կենտրոնացման 15 շրջանի, մեկ պահեստի և ևս մեկ ռազմական օբյեկտի։