Նեապոլի մերձակայքում 4.7 մագնիտուդով երկրաշարժից տուժածների թիվը հասել է 21-ի

Իտալիայի Նեապոլ քաղաքի մերձակայքում գտնվող Ֆլեգրեյան դաշտերի շրջանում գրանցված 4.7 մագնիտուդով երկրաշարժի հետևանքով տուժածների թիվը հասել է 21-ի։ Նրանցից երկուսի վիճակը գնահատվում է ծանր։ Զոհերի մասին տեղեկություններ չեն հաղորդվում, հայտնում է Reuters-ը։

Երկրաշարժը գրանցվել է հուլիսի 31-ին՝ տեղական ժամանակով ժամը 19։46-ին, շուրջ 3 կմ խորության վրա։ Այն դարձել է Ֆլեգրեյան դաշտերի տարածքում վերջին 40 տարվա ամենաուժեղ երկրաշարժը։

Երկրաշարժի հետևանքով վնասվել են շենքեր, փլուզվել են որոշ չբնակեցված կառույցներ և ժայռաբեկորներ են ընկել կայանված ավտոմեքենաների վրա։ Անբնակելի դարձած տներից տարհանվել է 22 ընտանիք։ Պոցուոլի քաղաքի ընդունման կենտրոնում բնակչության համար պատրաստվել է 185 մահճակալ։

Վնասվել է նաև Պոցուոլիի նավահանգստի կառամատույցը, ինչի հետևանքով նավահանգստի աշխատանքը դադարեցվել է։ Բարձրավոլտ էլեկտրահաղորդման հենասյան փլուզման պատճառով շուրջ 100 հազար բաժանորդ ժամանակավորապես հոսանքազրկվել է, սակայն մատակարարումը հիմնականում վերականգնվել է։

Երկաթուղային և մետրոյի որոշ երթուղիների աշխատանքը ժամանակավորապես դադարեցվել էր՝ ենթակառուցվածքների ստուգման նպատակով։