«Սարդ-մարդը. Նոր օր» ֆիլմը նախնական ցուցադրություններից ռեկորդային եկամուտ է գրանցել

Թոմ Հոլանդի մասնակցությամբ «Spider-Man: Brand New Day» ֆիլմը նախնական ցուցադրությունների ընթացքում հավաքել է 72 մլն դոլար՝ սահմանելով նոր ռեկորդ կինոարդյունաբերության պատմության մեջ։ Նոր նախագիծը գերազանցել է նախկին առաջատարին՝ «Վրիժառուներ. Վերջնախաղ» («Avengers: Endgame») ֆիլմին, որի նախնական ցուցադրությունների եկամուտը կազմել էր 60 մլն դոլար։

Մասնագետների կանխատեսումների համաձայն՝ ֆիլմի առաջին հանգստյան օրերի հասույթը կարող է կազմել 260-280 մլն դոլար։ Այդ դեպքում այն կհայտնվի բոլոր ժամանակների ամենահաջող մեկնարկ գրանցած ֆիլմերի շարքում՝ զիջելով միայն «Վրիժառուներ. Վերջնախաղ»-ին և առաջ անցնելով «Սարդ-մարդը. Տունդարձի ճանապարհ չկա» ֆիլմից։

Որոշ գնահատականներով՝ ֆիլմի մեկնարկային ցուցանիշը կարող է նույնիսկ գերազանցել 300 մլն դոլարը։ Բացի այդ, միջազգային շուկայում ակնկալվում է ևս 275-300 մլն դոլարի եկամուտ։

Ֆիլմի սյուժեն շարունակվում է նախորդ մասի իրադարձություններից չորս տարի անց։ Աշխարհը այլևս չի հիշում, որ Փիթեր Փարքերը հենց Սարդ-մարդն է։ Հերոսը հայտնվում է միայնակ վիճակում՝ կորցնելով կապը իր նախկին ընկերուհի Էմ Ջեյի (Զենդայա) և լավագույն ընկեր Նեդի (Ջեյքոբ Բատալոն) հետ։

Նոր արկածների ընթացքում Փիթեր Փարքերը ստիպված է դիմակայել նոր վտանգի՝ Սեյդի Սինքի մարմնավորած խորհրդավոր հակառակորդին։