Իրանը պատրաստ է վճռական պատասխան տալ ցանկացած սադրանքի․ Արաղչի

Իրանի արտաքին գործերի նախարար Աբբաս Արաղչին հեռախոսազրույցներ է ունեցել Պակիստանի բանակի հրամանատար Ասիմ Մունիրի և Թուրքիայի արտաքին գործերի նախարար Հաքան Ֆիդանի հետ։

Կողմերը քննարկել են տարածաշրջանում վերջին զարգացումները, ինչպես նաև, Իրանի գնահատմամբ, ԱՄՆ-ի «ագրեսիվ և ապակայունացնող գործողությունների» հնարավոր հետևանքները։ Զրույցների ընթացքում անդրադարձ է կատարվել նաև տարածաշրջանային լարվածության աճի և անվտանգության հետ կապված ռիսկերին։

Արաղչին ընդգծել է, որ Իրանը ուշադիր հետևում է իրավիճակի զարգացմանը և մտահոգված է հնարավոր սրացումներով։

Իրանի արտաքին քաղաքական գերատեսչության ղեկավարը նաև զգուշացրել է ԱՄՆ զինված ուժերի կողմից հնարավոր «արկածախնդիր գործողությունների» հետևանքների մասին՝ հայտարարելով, որ Թեհրանը պատրաստ է պաշտպանել իր ազգային ինքնիշխանությունը, տարածքային ամբողջականությունն ու անվտանգությունը։

Նրա խոսքով՝ Իրանը վճռական պատասխան կտա ցանկացած գործողության, որը կդիտարկի որպես սպառնալիք կամ սադրանք երկրի դեմ։