Ավստրալիայում որմնաշարված բուխարու մեջ գտել են գրադարանային գիրք, որի վերադարձն ուշացել էր գրեթե 150 տարով

Ավստրալիայում Կիամա քաղաքի հանրային գրադարան են վերադարձրել մի գիրք, որի վերադարձն ուշացել էր գրեթե 150 տարով։ Այն հայտնաբերվել է տան նորոգման ժամանակ․ գիրքը փակված էր մնացել չօգտագործվող բուխարու մեջ, հայտնել է Associated Press-ը։

1858 թվականին հրատարակված «Աթենքի հնությունները» (Antiquities of Athens) գիրքը գտել է տեղի բնակիչ Ռոս Սիմոնսը։ Նրա խոսքով՝ այն դրված էր թեյի արկղում, որը թաքցված էր հին բուխարու աղյուսաշարի հետևում։ Տասնամյակների ընթացքում գիրքը լրջորեն տուժել էր խոնավությունից։

Գրադարանում պատմել են, որ հաստատությունը բացվել է 1872 թվականին, հայտնաբերված գիրքը կազմել է նրա սկզբնական հավաքածուի մասը՝ մոտ հազար գրքերի թվում։ Ենթադրվում է, որ գիրքը վերցրել են գրադարանի բացումից անմիջապես հետո և այլևս չեն վերադարձրել։

Սիմոնսը կարծում է, որ գիրքը կարող էր վերցրած լինել իր մեծ պապի հայրը՝ Ջոն Սիմոնսը, որը XIX դարի վերջին ապրել է այդ տանը։

Գրադարանի աշխատակիցների հաշվարկներով՝ եթե տուգանքը հաշվարկվեր այն ժամանակվա կանոններով և գնաճը հաշվի առնելով, այն կկազմեր մոտ 28 հազար ավստրալական դոլար (մոտ 19,5 հազար ԱՄՆ դոլար)։ Սակայն այն գանձել հնարավոր չէ, քանի որ այդ ժամանակաշրջանի ընթերցողների վերաբերյալ գրառումները չեն պահպանվել։

Այժմ գիրքը կդառնա գրադարանի պատմական հավաքածուի մի մասը։ Ինչպես կատակել է դրա ղեկավար Միշել Հադսոնը, գիրքն այլևս ոչ մեկին չեն տա․ «Մենք չենք ուզում ևս 150 տարի սպասել, մինչև այն կրկին կվերադարձնեն»։