Կետանման շնաձկների ծածուկ կյանքը․ տեսախցիկներն առաջին անգամ ցույց են տվել, թե ինչ է տեղի ունենում օվկիանոսի խորքում (տեսանյութ)

Գիտնականներն առաջին անգամ տեսախցիկներ են ամրացրել կետանման շնաձկների վրա և պարզել, որ մոլորակի ամենամեծ ձկները սնունդ որոնելիս ջրի տակ անցկացնում են շատ ավելի երկար ժամանակ, քան նախկինում էր համարվում։

Հետազոտության արդյունքները հրապարակվել են Marine Biology ամսագրում։

Հետազոտողները տեսախցիկներ են տեղադրել 10 կետանման շնաձկների վրա Արևմտյան Ավստրալիայի Նինգալու խութի մոտ և ստացել են ավելի քան 22-ժամյա տեսագրություններ «առաջին ձեռքից»։ Սա հնարավորություն է տվել տեսնել կենդանիների վարքագիծն այնտեղ, որտեղ նավակներից, ինքնաթիռներից և դայվերների սուզումների դիտարկումներն անհնար էին։

Պարզվել է, որ կետանման շնաձկները ոչ միայն մակերեսին են ֆիլտրում սնունդը, այլ նաև դանդաղ սնվում են սուզումների ընթացքում, բաց երախով բարձրանում են դեպի մակերես և նույնիսկ սնունդ են հավաքում հենց ծովի հատակից քիչ վերև։ Սնվելու այս եղանակը ամենատարածվածներից մեկն է եղել։

Ընդհանուր առմամբ գիտնականները նկարագրել են վարքագծի 36 տարբեր մոդել, որոնցից 12-ը կապված է սնունդ որոնելու հետ, իսկ 6-ը գրանցվել է առաջին անգամ։

Հետազոտողների կարծիքով՝ սնվելու եղանակների բազմազանությունն օգնում է բացատրել, թե ինչպես են կետանման շնաձկները, որոնք հասնում են 18 մետր երկարության, կարողանում գոյատևել սննդարար նյութերով աղքատ արևադարձային ջրերում։

Չնայած հսկայական չափերին՝ նրանք սնվում են մանրագույն օրգանիզմներով՝ ջրիմուռներով, ձկների խավիարով և կրիլով։

Սակայն գիտնականները կարծում են, որ գլխավոր բացահայտումները դեռ առջևում են։ Կետանման շնաձկները կարող են սուզվել մեծ խորություններ, ուր արևի լույսն այլևս չի թափանցում, ուստի սովորական տեսախցիկները չեն կարող արձանագրել նրանց վարքագիծը։ Հենց այդ խորջրյա սուզումներն էլ կարող են թաքցնել աշխարհի ամենամեծ ձկան ամենահետաքրքիր գաղտնիքները։