Անակնկալ բացահայտում․ հնագետները գտել են գրեթե 1600 տարի առաջ շղթաներով կապկպված ասկետ կնոջ աճյուն

Հնագետները Երուսաղեմի Հին քաղաքի մերձակայքում գտնվող բյուզանդական վանքում հայտնաբերել են ծանր շղթաներով կապկպված ասկետի աճյուն։ Նոր հետազոտությունը ցույց է տվել, որ, հակառակ պատմաբանների երկարամյա պատկերացումներին, այդ մարդը, ամենայն հավանականությամբ, կին է եղել։

Աշխատանքի արդյունքները հրապարակվել են Journal of Archaeological Science-ում։

Վանքը գոյություն է ունեցել մոտավորապես մեր թվարկության 350-650 թվականներին։ Պեղումների ընթացքում գիտնականները գտել են երկու դամբարան՝ տղամարդկանց, կանանց և երեխաների աճյուններով։

Սակայն կմախքներից մեկը խիստ վնասված էր ծառերի արմատներից և ժամանակի ազդեցությունից։ Չնայած դրան՝ հետազոտողները նկատել են անսովոր մի մանրամասն՝ ոսկորները փաթաթված էին մետաղական շղթաներով, ինչը վկայում է ծայրահեղ խիստ ասկետիզմի պրակտիկայի մասին։

Վատ պահպանվածության պատճառով ավանդական մեթոդներով սեռը որոշել հնարավոր չի եղել։ Այդ ժամանակ գիտնականները կիրառել են ատամի էմալի սպիտակուցների վերլուծության ժամանակակից մեթոդ։ Նրանք ուսումնասիրել են ամելոգենին սպիտակուցը, որը տարբերվում է տղամարդկանց և կանանց մոտ։ Վերլուծությունը ցույց է տվել սպիտակուցի արական ձևի բացակայություն, ինչը բարձր հավանականությամբ թույլ է տալիս համարել, որ աճյունը պատկանել է կնոջ։

Բացահայտումը կասկածի տակ է դնում վաղ քրիստոնեության մասին արմատացած կարծիքը, թե ծայրահեղ ինքնասահմանափակման և ինքնախոշտանգման նման ձևերը կիրառել են բացառապես տղամարդիկ։ Այժմ գիտնականները կարծում են, որ կանայք նույնպես մասնակցել են նման կրոնական պրակտիկաների։

Հետազոտության հեղինակները նշել են, որ գտածոն էապես ընդլայնում է վաղ քրիստոնեությունում կանանց դերի մասին պատկերացումները և ցույց է տալիս, որ նրանք նույնպես կարող էին հետևել նույն դաժան հոգևոր պրակտիկաներին, ինչ որ տղամարդիկ։