Այդահոյում ֆասթֆուդի ռեստորանի մոտ հրաձգություն է տեղի ունեցել. 3 մարդ զոհվել է, յոթը՝ վիրավորվել

ԱՄՆ Այդահո նահանգի Թուին Ֆոլս քաղաքում In-N-Out Burger ռեստորանի մոտ հրաձգություն է տեղի ունեցել, որի հետևանքով երեք մարդ զոհվել է, ևս յոթը վիրավորվել են, նրանցից մի քանիսը գտնվում են ծայրահեղ ծանր վիճակում, հայտնում է Associated Press-ը։

Ոստիկանության տվյալներով, միջադեպը տեղի է ունեցել օգոստոսի 1-ի ցերեկը՝ մարդաշատ առևտրային շրջանում։ Դեպքի վայր ժամանած իրավապահները ռեստորանից ոչ հեռու հայտնաբերել են ենթադրյալ հրաձիգի մարմինը։ Իշխանությունները դեռևս չեն հստակեցրել՝ նա ներառվա՞ծ է զոհվածների թվում, թե ոչ։

Թուին Ֆոլսի ոստիկանապետ Մեթյու Հիքսը հայտնել է, որ բնակչության համար այլևս վտանգ չկա։ Հարձակվողի ինքնությունը և նրա գործողությունների դրդապատճառները պարզվում են։

Ականատեսների վկայությամբ, AR տիպի հրացանով զինված տղամարդը կրակ է բացել ռեստորանի մոտ։ Վկաներից մեկը հայտնել է, որ ատրճանակով զինված մեկ այլ տղամարդ պատասխան կրակ է բացել։ Դեպքի վայրից հրապարակված կադրերում երևում է նաև, թե ինչպես է կասկածյալը երկարափող զենքով մոտենում ավտոմեքենային։

Հրաձգության պահին ռեստորանում եղել են այցելուներ և աշխատակիցներ։ Ականատեսներից մեկը պատմել է, որ տեսել է, թե ինչպես էր հաստատության աշխատակիցը փորձում կայանատեղիից դուրս բերել կրծքավանդակի հրազենային վնասվածք ստացած իր վիրավոր գործընկերուհուն։ Այլ ականատեսներ հայտնել են, որ առաջին կրակոցներից հետո ռեստորանի աշխատակիցները հրամայել են այցելուներին պառկել հատակին, ինչից հետո մարդիկ խուճապահար սկսել են լքել շենքը։

Բոլոր տուժածները տեղափոխվել են St. Luke's Magic Valley բժշկական կենտրոն։ Քննությունը շարունակվում է։