Լիբանանի Կենտրոնական բանկի նախկին ղեկավար Ռիադ Սալամեն յուրացումների գործով տեղափոխվել է բանտ

Լիբանանի Կենտրոնական բանկի նախկին ղեկավար Ռիադ Սալամեն տեղափոխվել է բանտ այն բանից հետո, երբ մինչև այդ հիվանդանոցում գտնվում էր ոստիկանության հսկողության ներքո, հայտնում է AFP-ն՝ հղում անելով դատական աղբյուրին։

Աղբյուրը, որը ցանկացել է անանուն մնալ, հայտնել է, որ Սալամեն, որն ավելի վաղ դատարան տանող ճանապարհին վատ էր զգացել, հոսպիտալացվել է, ապա դատավորի որոշմամբ «տեղավորվել է կալանավորվածների շրջանում»՝ բանտում։

76-ամյա Սալամեի առողջական վիճակը լինելու է մշտական հսկողության տակ։ Անհրաժեշտության դեպքում նրան կցուցաբերվի բժշկական օգնություն կամ կկազմակերպվի տեղափոխում հիվանդանոց՝ դատական և բժշկական ընթացակարգերին համապատասխան։

Սալամեն պետք է ներկայանար դատարան՝ Լիբանանի Կենտրոնական բանկի նոր ղեկավար Կարիմ Սուվեյդի ներկայացրած հայցի շրջանակում։ Նրան մեղադրում են միջոցների յուրացման, ապօրինի հարստացման և փողերի լվացման մեջ։

Ավելի վաղ Սալամեն չէր ներկայացել նիստին, ինչից հետո դատարանը կարգադրել էր նրան բերել դատարան։ Սակայն ԿԲ նախկին ղեկավարը որոշել էր ներկայանալ ինքնուրույն և ճանապարհին վատ էր զգացել, ինչի պատճառով լսումը հետաձգվել էր։

Ավելի ուշ պարզվել էր, որ Սալամեն չէր գտնվում ոչ հիվանդանոցի շտապ օգնության բաժանմունքում, ուր նրան տեղափոխել էին, ոչ էլ գրանցված հասցեներում։ Դրանից հետո դատավորը հանձնարարել էր ուժային կառույցներին գտնել նրան և բերել հարցաքննության։

Բեյրութից դուրս գտնվող հիվանդանոցներից մեկում Սալամեին հայտնաբերելուց հետո դատարանը կարգադրել էր ուժեղացնել անվտանգության միջոցները նրա գտնվելու վայրի շուրջ և նրան համարել կալանքի տակ գտնվող։

Անցյալ ամիս գործով առաջին լսումը տեղի էր ունեցել Սալամեի տանը՝ նրա առողջական վիճակի վատթարացման պատճառով։ Հարցաքննությունն անցկացվել էր դատավորի ղեկավարությամբ։

Լիբանանի Կենտրոնական բանկը ավելի վաղ AFP-ին հայտնել էր, որ դարձել է «մի քանի հարյուր միլիոն եվրոյի չափով միջոցների յուրացման զոհ», որը, ըստ գերատեսչության վարկածի, իրականացվել էր նախկին կառավարչի կողմից՝ նրա շրջապատից մի քանի անձանց օժանդակությամբ։

Ռիադ Սալամեն ղեկավարել է Լիբանանի Կենտրոնական բանկը 1993 թվականից մինչև 2023 թվականի հուլիսը։ Իր գործունեության ընթացքում նա բախվել է բազմաթիվ մեղադրանքների՝ յուրացումների, ապօրինի հարստացման և հարկերից խուսափելու վերաբերյալ՝ Լիբանանում և այլ երկրներում իրականացվող քննությունների շրջանակում։

Ինքը՝ Սալամեն, հետևողականորեն մերժում է բոլոր մեղադրանքները և պնդում, որ իրեն դարձրել են «քավության նոխազ» Լիբանանում 2019 թվականին սկսված տնտեսական ճգնաժամի համար։