Axios․ Սաուդյան Արաբիայի թագաժառանգ արքայազնը Թրամփին կոչ է արել հրաժարվել Իրանի դեմ նոր հարվածներից

Սաուդյան Արաբիայի թագաժառանգ արքայազն Մոհամմեդ բին Սալմանը ԱՄՆ նախագահ Դոնալդ Թրամփին կոչ է արել նվազեցնել լարվածությունը և հրաժարվել Իրանի դեմ նոր լայնածավալ հարվածներ հասցնելու ծրագրերից, հաղորդում է Axios-ը՝ հղում անելով առաջնորդների հեռախոսազրույցի բովանդակությանը ծանոթ աղբյուրներին։

Աղբյուրների տվյալներով, բին Սալմանը Թրամփին մտահոգություն է հայտնել Իրանի դեմ հնարավոր ռազմական գործողության կապակցությամբ և պարզաբանումներ խնդրել Վաշինգտոնի հետագա քայլերի վերաբերյալ։

«Սաուդյան կողմը մտահոգություն է հայտնել և խնդրել է բացատրել գործողությունների ծրագիրը», — Axios-ին հայտնել է ամերիկացի պաշտոնյաներից մեկը։

Մեկ այլ աղբյուր հայտնել է, որ թագաժառանգ արքայազնը Թրամփին կոչ է արել գնալ դեէսկալացիայի ճանապարհով և զերծ մնալ հարվածներ հասցնելուց։

Ավելի ուշ Թրամփը հայտնել է, որ չեղարկել է Իրանի դեմ նախապատրաստված հարձակումը այն բանից հետո, երբ Թեհրանը և Մերձավոր Արևելքի մի շարք երկրներ Վաշինգտոնին խնդրել են հնարավորություն տալ շարունակելու դիվանագիտական ջանքերը։ Ամերիկայի նախագահի խոսքով՝ կողմերը հասել են «համաձայնության ուրվագծերին», որը պետք է ներառի Հորմուզի նեղուցի բացումը և Իրանի կողմից միջուկային սպառնալիքից հրաժարումը։

Սաուդյան Արաբիան մնում է ԱՄՆ-ի առանցքային դաշնակիցներից մեկը Մերձավոր Արևելքում և, չնայած Վաշինգտոնի հետ պարբերական տարաձայնություններին, բազմիցս փորձել է ազդել Իրանի հետ հակամարտության հարցում Թրամփի վարչակազմի մոտեցման վրա։

Ավելի վաղ Սաուդյան Արաբիայի պաշտպանության նախարար Խալիդ բին Սալմանը հանդիպել էր ԱՄՆ փոխնախագահ Ջեյ Դի Վենսի հետ։ Աղբյուրների տվյալներով՝ հանդիպման ընթացքում նա փոխանցել էր Էր Ռիյադի դիրքորոշումը՝ հօգուտ Իրանի հետ լարվածության նվազեցման։

Սաուդյան Արաբիայից բացի, դեէսկալացիայի կոչ են անում նաև տարածաշրջանի այլ երկրներ՝ այդ թվում Կատարը, ԱՄԷ-ն, Թուրքիան և Պակիստանը։ Իրանի արտաքին գործերի նախարար Աբաս Արաղչին բանակցություններ է վարել Թուրքիայի և Սաուդյան Արաբիայի արտաքին քաղաքական գերատեսչությունների ղեկավարների, ինչպես նաև Պակիստանի բանակի հրամանատար, ֆելդմարշալ Ասիմ Մունիրի հետ։