Լիտվան բողոքի նոտա է հանձնել Ռուսաստանին՝ Կիևի վրա հարձակման ժամանակ իր դեսպանատան վնասվելու առիթով

Լիտվայի արտաքին գործերի նախարարությունը օգոստոսի 1-ին Վիլնյուսում Ռուսաստանի դեսպանատան ներկայացուցչին կանչել է նախարարություն և նրան բողոքի նոտա հանձնել Կիևի դեմ իրականացված զանգվածային հրթիռային հարձակման կապակցությամբ, որի հետևանքով վնասվել են քաղաքացիական օբյեկտներ, այդ թվում՝ Լիտվայի դեսպանատան շենքը, հաղորդում է Delfi։

Ինչպես հայտնել են Լիտվայի ԱԳՆ-ից, օգոստոսի 1-ի գիշերը Ռուսաստանը հերթական լայնածավալ հարվածն է հասցրել Ուկրաինային։ Լիտվայի արտաքին գործերի նախարար Կյաստուտիս Բուդրիսը հայտարարել է, որ Կիևում Լիտվայի դեսպանատան մոտ ընկել է երկու հրթիռ՝ մեկը շենքից մոտ 150 մետր հեռավորության վրա, մյուսը՝ ընդամենը 10 մետր հեռավորության վրա։

Բողոքի նոտայում Վիլնյուսը դատապարտել է հարձակումը, դիվանագիտական ներկայացուցչության վնասումը և դեսպանատան աշխատակիցների անվտանգությանը սպառնացող վտանգը։

Լիտվայի արտաքին քաղաքական գերատեսչությունն ընդգծել է, որ նման գործողությունները 1961 թվականի դիվանագիտական հարաբերությունների մասին Վիեննայի կոնվենցիայի կոպիտ խախտում են։

Լիտվան հայտարարել է, որ հասցված վնասի գնահատումից հետո Ռուսաստանից կպահանջի փոխհատուցում և իրեն իրավունք է վերապահում ձեռնարկել լրացուցիչ պատասխան միջոցներ։

Բացի այդ, Վիլնյուսը կրկին կոչ է արել Մոսկվային անհապաղ դադարեցնել հակամարտության սրումը, կանգնեցնել ռազմական գործողություններն Ուկրաինայի դեմ, դուրս բերել ռուսաստանյան զորքերը Ուկրաինայի տարածքից՝ միջազգային ճանաչված սահմանների շրջանակում, և փոխհատուցել երկրին հասցված վնասը։