Գերմանիան Մարոկկոյին կոչ է արել թուլացնել լարվածությունը Սեուտայի շուրջ՝ միգրացիոն ճգնաժամի ֆոնին

Գերմանիան Մարոկկոյին կոչ է արել օգնել կայունացնել իրավիճակը Աֆրիկայի հյուսիսային ափին գտնվող իսպանական անկլավ Սեուտայի շուրջ, որտեղ վերջին օրերին իրավիճակը սրվել է միգրացիոն ճնշման պատճառով, հայտնում է BILD-ը։

Գերմանիայի արտգործնախարար Յոհան Վադեֆուլը հեռախոսազրույց է ունեցել Մարոկկոյի ԱԳ նախարար Նասեր Բուրիտայի հետ և կոչ արել նվազեցնել լարվածությունը։

«Սեուտայում ստեղծված իրավիճակը դարձավ իսկական սթրես-թեստ, որը մենք հաղթահարեցինք», — BILD-ին ասել է Վադեֆուլը։

Միաժամանակ նա ընդգծել է Եվրոպական միության արտաքին սահմանների վերահսկողությունն ուժեղացնելու անհրաժեշտությունը և նշել Եվրոպայից դուրս գտնվող պետությունների հետ համագործակցության կարևորությունը։

«Ապօրինի միգրացիան վերահսկելու համար մեզ անհրաժեշտ են գործընկերներ Եվրոպայից դուրս, ինչպես այս դեպքում՝ Մարոկկոն», — ասել է գերմանացի նախարարը։

ԶԼՄ-ների տվյալներով, Սեուտայի տեղական քաղաքական գործիչները նույնպես դիմել են Իսպանիայի իշխանություններին՝ տարածաշրջանին աջակցություն ցուցաբերելու կոչով։ Չնայած ճգնաժամի սրության նվազմանը, իրավիճակը շարունակում է մնալ լարված։

Ավելի վաղ իսպանական Սեուտա անկլավում տեղի էր ունեցել խոշոր միգրացիոն ճգնաժամ, որի ընթացքում մոտ 60 հազար միգրանտներ ապօրինաբար հատել էին սահմանը Մարոկկոյից։ Պաշտոնական տվյալներով, ճգնաժամի հետևանքով զոհվել է առնվազն 67 մարդ։

Այս ֆոնին Իսպանիան սկսել է պաշտպանական արգելապատնեշներ տեղադրել Տարախալ սահմանային անցակետի ալիքախորտակի վրա։

Սեուտան Հյուսիսային Աֆրիկայի տարածքում գտնվող Իսպանիայի երկու անկլավներից մեկն է՝ Մելիլյայի հետ միասին։ Այս տարածքները հատուկ կարգավիճակ ունեն և Իսպանիայի մասն են, սակայն գտնվում են Մարոկկոյի ափերի մոտ, ինչի պատճառով պարբերաբար դառնում են դեպի Եվրոպական միություն հասնել փորձող միգրանտների հիմնական երթուղիներից մեկը։