ԵՄ-ում ուժի մեջ է մտել ԱԲ-ի բովանդակության պիտակավորման պահանջը

Եվրոպական միությունում պաշտոնապես սկսել է գործել արհեստական բանականությամբ գեներացված բովանդակությունը պարտադիր մակնշելու պահանջը։

Այս կանոնը մասնավորապես վերաբերում է արհեստական բանականության միջոցով ստեղծված կամ ձևափոխված այն լուսանկարներին, ձայնագրություններին ու տեսանյութերին, որոնցում պատկերված են իրական անձինք, վայրեր, առարկաներ կամ իրադարձություններ։ Բացի այդ, պիտակավորման են ենթակա նաև հանրային հետաքրքրություն ներկայացնող թեմաներով ԱԻ գեներացրած այն տեքստերը, որոնք հանրայնացվել են առանց մարդու կողմից խմբագրվելու։

Սահմանված պահանջը չի տարածվում օժանդակ բնույթի ԱԻ համակարգերի վրա, ինչպիսիք են լուսանկարների մշակման ծրագրերը կամ ուղղագրության ստուգիչները։ Բացառությունների շարքում են նաև «ակնհայտորեն գեղարվեստական, ստեղծագործական, երգիծական կամ հորինված բնույթի» նյութերը։

Պիտակավորելու պարտավորվածություն ունեն ինչպես ԱԻ ոլորտի մատակարարները, այնպես էլ այն օգտատերերը, որոնք նման բովանդակությունը կիրառում են առևտրային կամ մասնագիտական գործունեության մեջ։ Այս շարքում ներառված են իշխանությունները, լրատվամիջոցները, ընկերությունները, հասարակական միավորումներն ու մասնագիտական ազդեցիկ անձինք (ինֆլուենսերները)։

Նշված կանոնները խախտելու դեպքում ընկերությունների համար նախատեսված են տուգանքներ՝ մինչև 15 միլիոն եվրոյի չափով կամ տարեկան համաշխարհային շրջանառության մինչև 3%-ի չափով։ Եվրոմիության հաստատությունների, գործակալությունների և մարմինների համար տուգանքի առավելագույն չափը սահմանվել է մինչև 750,000 եվրո։ Ինչ վերաբերում է փոքր ու միջին ձեռնարկություններին, ապա դրանց պատժամիջոցները կհաշվարկվեն համաչափության սկզբունքով։