Կանադայի մեծությամբ երկրորդ ավիաընկերության բորտուղեկցորդների գործադուլը հարյուրավոր չվերթներ է խափանել

Կանադայի մեծությամբ երկրորդ ավիաընկերության՝ WestJet-ի բորտուղեկցորդները կիրակի օրը գործադուլ են սկսել այն բանից հետո, երբ կողմերին չի հաջողվել համաձայնության գալ աշխատանքի վարձատրության պայմանների շուրջ, հայտնում է Associated Press-ը։

Ակցիայի ֆոնին փոխադրողն արդեն չեղարկել է ավելի քան 300 չվերթ, ինչը խաթարել է հազարավոր ուղևորների ծրագրերը երկարատև հանգստյան օրերի թեժ շրջանում։

Գործադուլի մեկնարկի մասին հայտնել է Կանադայի հանրային ծառայողների միությունը (CUPE), որը ներկայացնում է մոտ 4,4 հազար բորտուղեկցորդի։ Ավիաընկերությունը, նույնպես հաստատել է բողոքի ակցիայի մեկնարկը և հայտարարել, որ չի կարողանա իրականացնել նախատեսված չվերթները Boeing 737 և Boeing 787 ինքնաթիռներով։

Վեճի գլխավոր առարկան դարձել է բորտուղեկցորդների աշխատանքի վարձատրությունը մինչև թռիչքը և ինքնաթիռի վայրէջքից հետո։ Արհմիությունը պնդում է, որ գետնի վրա կատարվող պարտականությունների մի մասը փաստացի մնում է չվճարված։ WestJet-ում պնդում են, որ աշխատակիցները վարձատրվում են, այսպես կոչված, «կրեդիտային ժամերի» համակարգով, այլ ոչ թե ժամավճարով։

WestJet Group-ի գլխավոր տնօրեն Ալեքսիս ֆոն Հյոնսբրոխը հայտարարել է, որ ընկերությունն առաջարկել էր անցնել ամբողջ աշխատանքային ժամանակի ժամավճարի՝ թռիչքից առաջ և հետո, ինչպես նաև էապես բարձրացնել աշխատավարձերը նոր համաձայնագրի արդեն առաջին տարում։ Սակայն, ըստ նրա, արհմիությունը մերժել է այդ առաջարկը։

Իր հերթին, բորտուղեկցորդների արհմիութենական կազմակերպության ղեկավար Ալիա Հուսեյնը հայտարարել է, որ բանակցողները «մինչև վերջին րոպեն» փորձել են հասնել արդար համաձայնագրի, սակայն ավիաընկերության առաջարկը բավարար չի եղել։

Երկու կողմերն էլ հայտարարել են բանակցությունները վերսկսելու պատրաստակամության մասին։

WestJet-ը հայտնել է, որ չեղարկված չվերթների ուղևորները կկարողանան ձևակերպել գումարի վերադարձ կամ վերաամրագրել տոմսերը։ Միևնույն ժամանակ, WestJet Encore-ի տարածաշրջանային չվերթները Q400 ինքնաթիռներով, ինչպես նաև գործընկեր ավիաընկերությունների կողմից իրականացվող համատեղ չվերթները, շարունակում են գործել սովորական ռեժիմով։

Բորտուղեկցորդների գետնին աշխատանքային ժամանակի վճարման շուրջ վեճը նախկինում ևս դարձել էր Կանադայի ավիահաղորդակցության լայնածավալ խափանումների պատճառ։ Անցյալ տարվա ամռանը Air Canada-ի աշխատակիցների համանման եռօրյա գործադուլը ազդեց ավելի քան 100 հազար ուղևորի վրա և ավարտվեց փոխզիջումային համաձայնության ձեռքբերումից հետո։