Ynet․ Նեթանյահուն հրաժարվել է առաջ տանել ուլտրաորթոդոքսներին զինվորական ծառայությունից պաշտպանող օրենքը

Իսրայելի վարչապետ Բենիամին Նեթանյահուն իր գործընկերներին հայտարարել է, որ ընտրություններից հետո նոր կառավարության ձևավորման դեպքում առաջ չի տանի այն օրենքը, որը ուլտրաորթոդոքս հրեաներին կազատեր ձերբակալությունից կամ պատժամիջոցներից՝ զինվորական ծառայությունից խուսափելու համար։

Ինչպես հայտնում է Ynet պարբերականը, Նեթանյահուն այդ մասին ասել է փակ հանդիպման ժամանակ՝ նշելով, որ ավելի վաղ իր կոալիցիայի կողմից ընդունված օրենքը սպասված արդյունքը չի տվել։

«Այն նախատեսված էր լարվածության մակարդակը նվազեցնելու և հարեդիմների շրջանում զորակոչիկների թիվն ավելացնելու համար, սակայն գործնականում դա տեղի չունեցավ։ Ուստի հաջորդ կառավարությունում նման օրենք չի լինի», — վարչապետի խոսքն է մեջբերում Ynet-ը։

Խոսքը վերաբերում է իշխող կոալիցիայի ընդունած վիճահարույց օրենքին, որը փաստացի արգելափակում էր միջոցների կիրառումը այն ուլտրաորթոդոքս տղամարդկանց նկատմամբ, որոնք անտեսում են բանակից ուղարկված ծանուցագրերը։ Սակայն շուտով դրա գործողությունը կասեցվել է Իսրայելի Գերագույն դատարանի կողմից, որը պետք է վերջնական որոշում կայացնի դրա ճակատագրի վերաբերյալ։

Միևնույն ժամանակ Նեթանյահուն հասկացրել է, որ մտադիր է շարունակել փոխզիջումային լուծման որոնումը, որը թույլ կտա կրոնական դպրոցների աշակերտների մի մասին ծառայությունից ազատում ստանալ։

«Ընտրություններից հետո մենք կձևավորենք լայն ազգային կառավարություն, որը անհապաղ կընդունի զորակոչի մասին լիարժեք օրենք՝ համապատասխան Իսրայելի պաշտպանության բանակի կարիքներին», — հայտարարել է վարչապետը։ Ըստ Նեթանյահուի, նոր մոտեցումը հիմնված կլինի հետևյալ սկզբունքի վրա․ «Նա, ով Տորա չի ուսումնասիրում, կծառայի բանակում կամ կգնա բանտ»։

Ուլտրաորթոդոքսների զորակոչի հարցը շարունակում է մնալ իսրայելական քաղաքականության ամենասուր թեմաներից մեկը։ Հարեդիմ համայնքի տասնյակ հազարավոր 18-ից 24 տարեկան տղամարդիկ ձևականորեն պարտավոր են զինվորական ծառայություն անցնել, սակայն շատերը անտեսում են ծանուցագրերը։ Իրավիճակը հատկապես զգայուն է դարձել Գազայի հատվածում պատերազմի ֆոնին, երբ բանակը բախվել է անձնակազմի պակասի, իսկ հասարակությունում ուժեղացել է դժգոհությունը երկրի պաշտպանության բեռի անհավասար բաշխման պատճառով։

Օրենքի գործողությունը կասեցնելու վերաբերյալ Գերագույն դատարանի որոշումը լուրջ հարված է դարձել Նեթանյահուի կոալիցիայի մեջ մտնող ուլտրաորթոդոքս կուսակցությունների համար։ Նրանց համար ծառայությունից ազատումների պահպանումը քաղաքական հիմնական պահանջներից մեկն է, մինչդեռ աշխարհիկ և կենտրոնամետ ուժերը պահանջում են պետության պաշտպանության գործում բոլոր քաղաքացիների հավասար մասնակցություն։