Կրակը մոտենում է Մեգարային․ Աթենքից արևմուտք խոշոր հրդեհը հազարավոր հեկտար անտառ է ոչնչացրել

Աթենքից արևմուտք խոշոր անտառային հրդեհը շարունակում է տարածվել արդեն երրորդ օրն անընդմեջ։ Հունաստանի իշխանությունները կարգադրել են տարհանել Մեգարայի արդյունաբերական գոտին և մի շարք մոտակա գյուղերի բնակիչներին, մինչդեռ հարյուրավոր հրշեջներ փորձում են կանգնեցնել կրակի տարածումը, հայտնում է Kathimerini-ն։

Ուրբաթ օրը Ագիոս-Վասիլիոս շրջանում սկսված հրդեհը շաբաթ օրը հասել է Կորնթոսի ծոցի ափին գտնվող առափնյա Պորտո-Գերմենո քաղաք, որը գտնվում է մայրաքաղաքից մոտ 70 կիլոմետր հեռավորության վրա, իսկ կիրակի սկսել է մոտենալ Մեգարային։

Տարերքի դեմ պայքարին ներգրավված են մոտ 500 հրշեջ, 134 միավոր տեխնիկա և ջուր լցնող ութ ինքնաթիռ։ Սակայն փրկարարների աշխատանքը բարդացնում են ուժեղ և փոփոխական քամիները, որոնց արագությունը գերազանցում է 100 կմ/ժ-ը։

Տարհանում է հայտարարվել Մեգարայի արդյունաբերական պարկում, ինչպես նաև Կանդիլի, Ագիա-Սկեպի, Տուտուլի, Նեա-Դաֆնի, Պեֆկենեաս և Ագիոս-Սարանտիս բնակավայրերում։ Հունական ERT հեռուստաալիքի տվյալներով, Պորտո-Գերմենոյում կրակից ոչնչացվել կամ վնասվել է մոտ 200 տուն, իսկ այրված անտառների և թփուտների տարածքը հասել է մոտ 10 հազար հեկտարի։

Հունաստանի վարչապետ Կիրիակոս Միցոտակիսը հայտարարել է, որ երկիրը ապրում է «չափազանց բարդ օրեր»՝ ծայրահեղ եղանակային պայմանների պատճառով։ Նա խոստացել է պետական օգնություն այն բնակիչներին, որոնց տները տուժել են հրդեհներից։

«Մենք պետք է ազնիվ լինենք միմյանց հետ։ Վերջին տարիներին մենք ավելի շատ միջոցներ ենք ներդրել, քան երբևէ, քաղաքացիական պաշտպանության համակարգի ամրապնդման համար, բայց լինում են պահեր, երբ բնությունն ու եղանակային պայմանների ուժը գերազանցում են պլանավորման և արձագանքման ցանկացած մարդկային հնարավորություններ»,— գրել է Միցոտակիսը։

Աթենքի մերձակայքում բռնկված հրդեհի կապակցությամբ ձերբակալվել է երկու մարդ, որոնց մեղադրանք է առաջադրվել քրեական հոդվածներով։ Քննության վարկածով, հրդեհը կարող էր սկսվել հողմակայանի ենթակառուցվածքից թռած կայծերից, որը այն միացնում է հիմնական էլեկտրացանցին։ Ձերբակալվածները մասնակցել են այդ օբյեկտի շինարարությանը։

Միաժամանակ խոշոր հրդեհ է մոլեգնում Կեֆալոնիա կղզում։ Այնտեղ տարհանվել են ութ բնակավայրերի բնակիչներ, այդ թվում՝ Պասրա, Կրեմմիդի, Մարկոպուլո և Կատիլիո բնակավայրերից։ Տեղում աշխատում են տասնյակ հրշեջներ։

Իշխանությունները հայտարարել են հրդեհային վտանգի բարձրացված՝ հնարավոր հինգից չորրորդ՝ մակարդակ Մեծ Աթենքի շրջանի և Եվիա կղզու համար։ Հունաստանը նաև շարունակում է վերացնել անցած շաբաթվա մի շարք ավերիչ հրդեհների հետևանքները, որոնց հետևանքով զոհվել է երեք հրշեջ։