Աֆրիկայի ամենաերկար մայրուղին անվանակոչվել է Թրամփի պատվին

Մարոկկոյի թագավոր Մոհամեդ VI-ի որոշմամբ Տիզնիտ-Դախլա ավելի քան 1055 կմ երկարությամբ մայրուղին անվանակոչվել է ԱՄՆ նախագահ Դոնալդ Թրամփի պատվին․ այդ մասին գրում է РИА Новости-ն՝ վկայակոչելով MAP լրատվական գործակալությանը։

Ինչպես գրում է MAP պետական գործակալությունը, թագավորը Թրամփին ուղղված նամակում նշել է, որ որոշումը պայմանավորված է 2020 թվականին նրա վարչակազմի կողմից Արևմտյան Սահարայի նկատմամբ Մարոկկոյի ինքնիշխանության ճանաչմամբ։

Մոհամեդ VI-ի խոսքով՝ մայրուղին ռազմավարական նշանակություն ունի՝ միացնելով Մարոկկոյի հյուսիսն ու հարավը, նաև Եվրոպան և Աֆրիկյան մայրցամաքը։

MAP-ի տվյալներով՝ Թրամփը հուլիսի 26-ին շնորհակալություն է հայտնել Մարոկկոյի թագավորին այդ որոշման համար և հայտնել, որ հույս ունի մոտ ապագայում անցնել մայրուղու ամբողջ երկայնքով։