Պակիստանը լայնածավալ ռազմական ուժեր է տեղակայում սահմանին

Պակիստանը Հնդկաստանի հետ սահմանին տեղակայել է Չինաստանում արտադրված SH-15 տիպի 250 ինքնագնաց հաուբից՝ զգալիորեն ամրապնդելով իր հրետանային կարողությունները։ Նոր համակարգերը նախատեսված են հեռահար հարվածային ներուժն ուժեղացնելու և բանակի մարտական պատրաստվածությունը բարձրացնելու համար։

SH-15-ը կարող է զարգացնել մինչև 90 կմ/ժ արագություն և արդյունավետ գործել նաև բարդ տեղանքում։ 155 մմ, 52 տրամաչափ երկարությամբ հրանոթը ստանդարտ զինամթերքով խոցում է մինչև 40 կմ հեռավորության վրա գտնվող թիրախներ, իսկ V-LAP հրթիռային արագացմամբ արկերի կիրառման դեպքում խոցման հեռավորությունը կարող է հասնել 53–72 կմ-ի։

Համակարգը համալրված է ավտոմատ կրակի կառավարման համակարգով և հիդրավլիկ կայունացնող հենակներով, որոնք թույլ են տալիս արագ կրակ բացել և րոպեում արձակել մինչև վեց արկ։ Բարձր շարժունակության շնորհիվ անձնակազմը կարող է կարճ ժամանակում փոխել դիրքը՝ նվազեցնելով հակահրետանային հարվածների վտանգը։

SH-15-ների մատակարարումը ևս մեկ անգամ ընդգծում է Չինաստանի և Պակիստանի միջև խորացող ռազմատեխնիկական համագործակցությունը, որն վերջին տարիներին շարունակաբար ընդլայնվում է։