Թուրքիայի խորհրդարանի անդամը ճանաչել է հայերի ցեղասպանությունը

Քրդամէտ «Ժողովրդավարական հասարակության» փոխնախագահ, Թուրքիայի խորհրդարանի անդամ Ահմետ Թուրքը կիրակի օրը՝ փետրվարի 3-ին, հարցազրույցի ժամանակ հայտարարել է, որ քուրդ ժողովուրդը մասնակցել է 1915 թվականին հայերի, ասորիների և եզդիների ցեղասպանությանը, և ինքը՝ որպես քուրդ ժողովուրդի անդամ, իր ժողովրդի անունից ներողություն է խնդրում հայ ժողովրդից։ Հարցազրույցի ժամանակ Ահմեդ Թուրքը կոչ է արել Թուրքիայի վարչապետ Ռեջեփ Թայիփ Էրդողանին ճանաչել պատմական իրողությունը:

Նա մեկնաբանել է, որ քուրդ ժողովուրդը հայերի նկատմամբ 1915 թվականին հանցագործություն է կատարել:   

«Մեր նախնիներն անարդարություն են գործել հայերի, ասորիների, եզդիների դեմ: Նրանց ձեռքերն արյունոտ են, նրանց ձեռքերն արյունոտված են այս ժողովուրդների արյունով: Ուստի՝ մենք` որպես նրանց ժառանգներ, ներողություն ենք խնդրում»,-նշել է Թուրքը:

«Որպես քուրդ ժողովուրդ՝ մենք ընդունում ենք, որ հանցագործություն ենք գործել հայերի նկատմամբ, սակայն դա տեղի է ունեցել մեր կամքին հակառակ»,-նշել է քուրդ պաշտոնյան և ավելացրել. «Թուրք կառավարությունը, փոխարեն դա մերժելու, նույնպես պետք է ներողությունը հայտնի: Արմատական փոփոխությունների կարիք կա այստեղ»: 

Նշենք նաև, որ թուրքական «Ոչ ասենք ցեղասպանությանը և ազգայնամոլությանը» շարժման գլխավոր վեբ-կայքում հրապարակվել է հրեա-թուրք բարեգործ Ալաթոնի հոդվածը, որում, մասնավորապես, կարդում ենք. «Մոտենում է 2015 թվականի ապրիլի 24ը: Եկէ՛ք փոխենք մեր մերժողական քաղաքականությունը: Արդէն ամոթ է: Ես հոգնել եմ անցյալի հետ առերեսվելու վախից: 90 տարի մենք բազմաթիվ մեղքեր ենք գործել: Կմախքները լցրել ենք մեր պահարանները եւ փակել դռները: Կմախքները սկսել են փտել և նրանց հոտն արդեն անտանելի է դարձել: Եկէք մեր ձայնը լսելի դարձնենք Անկարայի մեր պատգամավորներին: Պատգամավորներն էլ թող ձայնը լսելի դարձնեն իրենց կուսակցությունների ղեկավարներին, որպեսզի կարողանանք  բացել կմախքներով լեցուն մեր պահարանները»:

Այս մասին հայտնում է Asbarez.com լրատվական կայքը: