Պենտագոնը համաձայնագրեր է ստորագրել Patriot և THAAD հրթիռների արտադրությունն ավելացնելու վերաբերյալ

ԱՄՆ-ի պաշտպանական գերատեսչությունը՝ Պենտագոնը, հայտարարել է Northrop Grumman և Lockheed Martin ընկերությունների հետ շրջանակային համաձայնագրեր կնքելու մասին, որոնք ուղղված են Patriot և THAAD հրթիռների արտադրության զգալի ավելացմանը։ Այս մասին հայտնում է «ՌԻԱ Նովոստի»-ն։ 

ԱՄՆ պաշտպանության նախարարությունը հայտնել է, որ այդ համաձայնագրերը առանցքային դեր են խաղում խոշոր մատակարարների համար պահանջարկի երկարաժամկետ երաշխիքների ապահովման գործում, ինչը թույլ կտա եռապատկել Patriot Advanced Capability-3 համակարգերի և քառապատկել Terminal High Altitude Area Defense համակարգերի արտադրության ծավալները։

«Համաձայնագրերը կապահովեն արտադրական հզորությունների զգալի աճ՝ հրթիռային հատվածի արդիականացման ծրագրի շրջանակում, ինչպես նաև հնարավորություն կընձեռեն պինդ վառելիքով աշխատող հրթիռային շարժիչների մատակարարման երկրորդ աղբյուր ստեղծելու համար։ Համաձայնագրերից մեկը թույլ կտա քառապատկել մասնավորապես THAAD համակարգի որսացող հրթիռների կառուցվածքային բաղադրիչների արտադրությունը։ Դրանք ներառում են այնպիսի կարևորագույն մասեր, ինչպիսիք են հրթիռի իրանի միջին հատվածները, գլխամասային ծածկույթները և ուղղորդիչ հանգույցները», — հայտնել է Պենտագոնը։