Գրենլանդիայի նկատմամբ ԱՄՆ-ի սպառնալիքի պայմաններում Դանիայի իշխանությունները զորակոչել են մոտ 1600 նորակոչիկների

Դանիայի իշխանությունները զորակոչել են մոտ 1600 նորակոչիկների՝ երկրի պաշտպանական կարողությունները հզորացնելու համար՝ Գրենլանդիայի նկատմամբ ԱՄՆ-ի սպառնալիքի պայմաններում, հաղորդում է Reuters-ը։

Գործակալության տվյալներով՝ զորակոչիկները արդեն սկսել են իրենց թարմացված 11-ամսյա զինվորական ծառայությունը, որը բարեփոխում է իրականացվում իշխանությունների կողմից երկրի անվտանգությունն ապահովելու ջանքերի շրջանակներում և մասամբ պայմանավորված է Գրենլանդիայի վերաբերյալ ԱՄՆ վարչակազմի պնդումներով։

Reuters-ը նշում է, որ զորակոչիկներից մի քանիսը ուղղակիորեն կուղարկվեն Գրենլանդիա, որտեղ մոտ 100 զինվոր կմնա մեկ ամիս։ Մինչև 2033 թվականը Դանիան նախատեսում է զորակոչիկների թիվը հասցնել 7500-ի։

Գրենլանդիան Դանիայի ինքնավար տարածք է։ 1951 թվականին Վաշինգտոնը և Կոպենհագենը, ՆԱՏՕ-ի դաշինքի իրենց պարտավորություններից բացի, ստորագրեցին Գրենլանդիայի պաշտպանության պայմանագիրը։ Դրա համաձայն՝ ԱՄՆ-ն պարտավորվեց պաշտպանել կղզին հնարավոր ագրեսիայից։ Ամերիկայի առաջնորդ Դոնալդ Թրամփը բազմիցս հայտարարել է, որ Միացյալ Նահանգներին Գրենլանդիան անհրաժեշտ է անվտանգությունն ապահովելու համար։