ԱՄՆ-ն կրկնապատկել է TRIPP+ ձեռնարկատիրական ֆոնդի ֆինանսավորումը՝ հասցնելով 402 մլն դոլարի

«Հետք»-ի փոխանցմամբ՝ ԱՄՆ իշխանությունները կրկնապատկել են TRIPP+ ձեռնարկատիրական ֆոնդի միջոցների ծավալը՝ այն 201 մլն դոլարից հասցնելով 402 մլն դոլարի։ Այս մասին տեղեկությունը հրապարակվել է ամերիկյան highergov.com կայքում, որը հետևում է պետական դրամաշնորհներին։

TRIPP+ ձեռնարկատիրական ֆոնդը հիմնադրվել է 2026 թվականի հունվարի 26-ին՝ Հայաստանի արտգործնախարար Արարատ Միրզոյանի և ԱՄՆ պետքարտուղար Մարկո Ռուբիոյի Վաշինգտոնում կայացած հանդիպումից երկու շաբաթ անց։ Այն առանձին կառույց է և չի նույնացվում TRIPP Development Company-ի հետ, որը նախատեսված է Հայաստանի հարավով անցնող TRIPP երթուղու ենթակառուցվածքների զարգացման համար։

Ըստ հրապարակման՝ TRIPP Development Company-ում բաժնեմասերի 26 տոկոսը պատկանելու է Հայաստանին, իսկ 74 տոկոսը՝ ԱՄՆ-ին՝ ԱՄՆ Միջազգային զարգացման ֆինանսական կորպորացիայի (DFC) դուստր ընկերության միջոցով։

TRIPP+ ձեռնարկատիրական ֆոնդը ղեկավարում է գործարար Կոնստանտին Սոկոլովը, որը համարվում է նաև «Վիվա Արմենիա» ընկերության 20 տոկոսի բաժնետերը։ Դելավերում գրանցված ընկերությունների պաշտոնական տվյալներում ֆոնդը ներկայացված է Trans-Caspian Enterprise Fund անվամբ։