Առաջ են քաշվել Իրկուտսկի մարզում անհետացած Cessna 182 ինքնաթիռի կորստի երեք վարկածներ

Ռուսաստանի Քննչական կոմիտեն հայտնել է Իրկուտսկի մարզում անհետացած Cessna 182 ինքնաթիռի կորստի երեք հնարավոր վարկածների մասին։ Դրանք են՝ տեխնիկական անսարքությունը, օդաչուի թույլ տված սխալը և երթուղուց շեղվելու հետևանքով իրականացված վթարային վայրէջքը։

Դեպքի առթիվ հարուցվել է քրեական գործ՝ օդային տրանսպորտի շահագործման և անվտանգության կանոնների խախտման հոդվածով։ Քննիչները շարունակում են որոնողական աշխատանքները՝ անձնակազմի գտնվելու վայրը պարզելու նպատակով։ Նրանք նաև զննել են ինքնաթիռի վերջին լիցքավորման վայրը, առգրավել ավիավառելիքի նմուշներ և ուղարկել դրանք քիմիական փորձաքննության, ինչպես նաև ուսումնասիրում են օդանավի տեխնիկական փաստաթղթերը։

Cessna 182-ը օգոստոսի 3-ին տեղական ժամանակով ժամը 13:00-ին օդ էր բարձրացել Մամա ավանի օդանավակայանից՝ Բոդայբոյի անտառտնտեսության տարածքում անտառային հրդեհների մոնիթորինգ իրականացնելու նպատակով։ Նախատեսված ժամին անձնակազմը կապի դուրս չի եկել և օդանավը չի վերադարձել օդանավակայան։ Ինքնաթիռում եղել են երկու մարդ՝ օդաչու-դիտորդը և օդանավի հրամանատարը։ Արտակարգ ռադիոփարոսը չի գործել, իսկ աղետի ազդանշան չի փոխանցվել։