Հայ Դատի հանձնախումբը դատապարտել է Երուսաղեմի հայկական թաղամասում տեղի ունեցած հարձակումը

Երուսաղեմի Հայ Դատի հանձնախումբը խստորեն դատապարտել է հայկական թաղամասում տեղի ունեցած միջադեպը, որի ընթացքում, ըստ հայտարարության, վեց կրոնավոր իսրայելցի հրեաներ թքել են Սրբոց Հակոբյանց Մայր Տաճարի սուրբ մուտքի վրա և քարեր նետել հայ բնակիչների տների ուղղությամբ։

Հանձնախումբը նշել է, որ այս դեպքը հայկական համայնքի դեմ ուղղված ոտնձգությունների և ահաբեկման շարունակական դրսևորումներից է, իսկ նման հարձակումների կրկնվելը վկայում է անպատժելիության մթնոլորտի մասին։

Հայտարարությամբ կոչ է արվել Իսրայելի նախագահ Իցհակ Հերցոգին հրապարակայնորեն դատապարտել միջադեպը և վերահաստատել երկրի հանձնառությունը՝ պաշտպանելու բոլոր կրոնական և ազգային համայնքների անվտանգությունն ու իրավունքները։

Միաժամանակ, հանձնախումբը դիմել է Իսրայելի իշխանություններին և իրավապահ մարմիններին՝ պահանջելով իրականացնել անաչառ քննություն, պատասխանատվության ենթարկել մեղավորներին, ինչպես նաև կոչ է արել միջազգային կառույցներին և դիվանագիտական ներկայացուցչություններին ուշադրության կենտրոնում պահել Երուսաղեմի հայ համայնքի անվտանգության և իրավունքների հարցը։