Դաշնային դատարանն ԱՄՆ գործակալներին թույլատրել է թաքցնել դեմքերը՝ հակառակ Նյու Յորքի օրենքին

ԱՄՆ-ում դաշնային դատավորը որոշել է, որ Նյու Յորք նահանգը չի կարող արգելել դաշնային իրավապահ մարմինների աշխատակիցներին դիմակներ դնել և նրանց պարտավորեցնել ունենալ տեսանելի նույնականացման տվյալներ, հաղորդում է Associated Press-ը։

Որոշումն ընդունել է Նյու Յորքի հյուսիսային շրջանի շրջանային դատարանի դատավոր Մեյ Դ’Ագոստինոն։ Նա հայտարարել է, որ, չնայած նահանգի ձգտմանը ապահովելու ոստիկանության աշխատանքի թափանցիկությունը, հարցը ոչ թե քաղաքականության նպատակահարմարության, այլ դրա՝ ԱՄՆ Սահմանադրությանը համապատասխանելու մեջ է։

Դատարանի կարծիքով՝ Նյու Յորքի պահանջները կարող են խախտել դաշնային օրենսդրության գերակայության սկզբունքը, որը սահմանափակում է նահանգների հնարավորությունները կարգավորելու դաշնային իրավապահ մարմինների գործունեությունը։

Սահմանափակումները ներառվել էին իրավապահ համակարգի բարեփոխման միջոցառումների փաթեթում, որն ընդունվել էր նահանգի բյուջեի շրջանակում և մայիսին ստորագրվել էր դեմոկրատ նահանգապետ Քեթի Հոքուլի կողմից։ Օրենքը ուժի մեջ է մտել հունիսին։

Դատարանի որոշումից հետո Հոքուլը և նահանգի գլխավոր դատախազ Լետիշիա Ջեյմսը հայտարարել են, որ դաշնային գործակալների կողմից դիմակների օգտագործումը չեն համարում բնակիչների անվտանգությունը բարձրացնող գործոն և ուսումնասիրում են հետագա հնարավոր իրավական քայլերը։

Վեճը ծագել է միգրացիոն ռեյդերի ուժեղացման ֆոնին՝ Դոնալդ Թրամփի վարչակազմի իշխանության գալուց հետո։ Ավելի վաղ դաշնային դատարանը նաև արգելափակել էր Կալիֆոռնիայում նմանատիպ օրենքը, որը մեծամասամբ իրավապահներին արգելում էր գործողությունների ընթացքում թաքցնել դեմքերը։

Մայիսին ԱՄՆ արդարադատության նախարարությունը հայց էր ներկայացրել Կոնեկտիկուտի դեմ՝ դաշնային գործակալների կողմից դիմակների օգտագործումը սահմանափակող օրենքի պատճառով։ Նյու Յորքի գործով որոշումը կարող է ազդել այլ նահանգների նմանատիպ նախաձեռնությունների վրա։