Ռուսաստանում հայտարարել են, որ արհեստական բանականության ներդրումը դեռ չի հանգեցրել աշխատակիցների կրճատման

Ռուսաստանում արհեստական բանականության (ԱԲ) ներդրման հետևանքով աշխատակիցների կրճատումներ առայժմ չեն գրանցվում, իսկ ընկերությունների և մասնագետների շրջանում նոր տեխնոլոգիաների նկատմամբ զգուշավոր վերաբերմունքը շարունակում է պահպանվել։ Այդ մասին հայտնում է «Մոսկվա» լրատվական գործակալությունը՝ հղում անելով SuperJob ծառայության փորձագետներին։

Նրանց գնահատմամբ՝ գործատուները դեռ հիշում են 2024 թվականին արձանագրված աշխատուժի սուր պակասը, ուստի չեն շտապում հրաժարվել աշխատակիցներից։ Փոխարենը, ազատված հաստիքները հաճախ չեն համալրվում․ դրանց մի մասը ավտոմատացվում է արհեստական բանականության միջոցով, իսկ մյուս գործառույթները վերաբաշխվում են գործող աշխատակիցների միջև։ Փորձագետների խոսքով՝ ԱԲ-ն ավելի շատ դժվարություններ է ստեղծում սկսնակ մասնագետների աշխատանքի տեղավորման համար, հատկապես ՏՏ ոլորտում, քան դառնում փորձառու աշխատակիցների ազատման պատճառ։

SuperJob-ում նաև նշել են, որ վերջին մեկ տարվա ընթացքում տարբեր մասնագիտությունների ներկայացուցիչների սպասումները արհեստական բանականությունից նվազել են։ Միաժամանակ աճել է այն մարդկանց թիվը, որոնք անհանգստանում են ԱԲ-ի զարգացումից․ եթե նախկինում տեխնոլոգիաներից չէր վախենում հարցվածների 55 տոկոսը, ապա այժմ այդ ցուցանիշը նվազել է մինչև 49 տոկոս։