Թաիլանդից թմրամիջոց պարունակող կոնֆետներ տեղափոխած տղամարդը դատապարտվել է ավելի քան 10 տարվա ազատազրկման

Նովոսիբիրսկի մարզի դատարանը 10 տարի և 1 ամիս ազատազրկման է դատապարտել տեղի 25-ամյա բնակչին, որը Թաիլանդից Ռուսաստան էր տեղափոխել թմրամիջոց պարունակող կոնֆետներ։ Այդ մասին հայտնում է Արևմտասիբիրյան տրանսպորտային դատախազությունը։

Քննության տվյալներով՝ տղամարդը 2025 թվականի հոկտեմբերին Պհուկետ կղզուց գնել էր տետրահիդրոկաննաբինոլ (THC) պարունակող քաղցրավենիք և փորձել էր այն տեղափոխել Ռուսաստան՝ անձնական օգտագործման նպատակով։ Սակայն մաքսային հսկողության ընթացքում արգելված արտադրանքը հայտնաբերվել և առգրավվել է։

Դատարանը նրան մեղավոր է ճանաչել թմրամիջոցների մաքսանենգության և ապօրինի պահպանման հոդվածներով։ Պատիժը նա կկրի խիստ ռեժիմի քրեակատարողական հիմնարկում։