Թուրք լրագրողների պատվիրակությունն այցելել է Աղդամ՝ «Ղարաբաղ․ խաղաղության աշխարհագրություն» ծրագրի շրջանակում

Թուրքիա-Ադրբեջան բարեկամության, համագործակցության և համերաշխության հիմնադրամի (TADİV) և Միջմշակութային ցանցային ասոցիացիայի նախաձեռնությամբ իրականացվում է «Ղարաբաղ․ խաղաղության աշխարհագրություն. վերակառուցում, կայունություն և տարածաշրջանային համագործակցություն Հարավային Կովկասում» ծրագիրը։

Ծրագրի շրջանակում Թուրքիայի տարբեր լրատվամիջոցներ ներկայացնող 20 լրագրող այցելել է Արցախի ադրբեջանական վերահսկողության տակ գտնվող տարածքներ։ Պատվիրակությունը եղել է Աղդամում (Ակնա), որտեղ ծանոթացել է ականազերծման աշխատանքների ընթացքին։

Ականազերծման մասնագետ Հալիկ Զուլֆուկարովը լրագրողներին ներկայացրել է իրականացվող ծրագրերը՝ նշելով, որ Աղդամի ավելի քան 20 հատվածներում շարունակվում են ականազերծման աշխատանքները։ Նրա խոսքով՝ աշխատանքներին ներգրավված է շուրջ 350 մասնագետ, մինչ այժմ վնասազերծվել է 42 664 ական, իսկ ականազերծված տարածքների ընդհանուր մակերեսը հասել է 291 684 հեկտարի։

Զուլֆուկարովը նաև նշել է, որ նախկինում՝ 2017-2018 թվականներին, մասնակցել է Իրան-Թուրքիա սահմանին իրականացված ականազերծման աշխատանքներին։

Աղբյուր՝ Ermenihaber