Ռուսաստանում ցորենի և գարու գները մեկ տարվա ընթացքում նվազել են մինչև 20 տոկոսով

Ռուսաստանի եվրոպական հատվածում հուլիսի վերջի դրությամբ երրորդ դասի ցորենի գինը նվազել է մինչև 13,5 հազար ռուբլի մեկ տոննայի համար, իսկ չորրորդ դասինը՝ մինչև 12,2 հազար ռուբլի։ Ինչպես հայտնում է «Կոմերսանտ»-ը՝ հղում անելով «Պրոզեռնո» վերլուծական կենտրոնի տվյալներին, մեկ տարվա ընթացքում երրորդ դասի ցորենը էժանացել է 17,8 տոկոսով, չորրորդ դասինը՝ 20,1 տոկոսով, իսկ կերային գարին՝ 18,7 տոկոսով։

Փորձագետների գնահատմամբ՝ գների կտրուկ անկումը սկսվել է Ազովի ծովի նավահանգիստներից բեռնափոխադրումների սահմանափակումներից հետո։ Շուկայում առաջարկի աճը, արտահանման նվազումը և պահանջարկի անկումը ստիպում են որոշ արտադրողների ցորենը վաճառել նույնիսկ 8-9 հազար ռուբլի մեկ տոննայի դիմաց, մինչդեռ մի քանի շաբաթ առաջ այն վաճառվում էր 14-15 հազար ռուբլով։

Վերլուծաբանների կարծիքով՝ առաջիկա շաբաթներին հացահատիկի գների նվազման միտումը կարող է շարունակվել։ Դրան նպաստում են նաև ծովային փոխադրումների թանկացումը և ռուսական ցորենի հիմնական գնորդների՝ Թուրքիայի և Եգիպտոսի թույլ պահանջարկը։ Օգոստոսին ռուսական ցորենի արտահանումը, ըստ կանխատեսումների, կարող է նվազել 32-43 տոկոսով։