Ռուսաստանի ՊՆ-ն գիշերային հարվածները մեկնաբանել է Պուտինի հայտնի արտահայտությամբ

Ռուսաստանի պաշտպանության նախարարությունը Ուկրաինայի տարածքին գիշերը հասցված հարվածները մեկնաբանել է նախագահ Վլադիմիր Պուտինի 2018 թվականին հնչեցրած հայտնի արտահայտությամբ։ Գերատեսչությունը Telegram-ում հրապարակել է հրթիռի արձակման լուսանկար՝ կից գրելով. «Մեզ ոչ ոք չէր լսում։ Հիմա լսեք»։

Այս խոսքերը Պուտինը հնչեցրել էր 2018 թվականի մարտի 1-ին Դաշնային ժողովին ուղղված իր ուղերձի ժամանակ՝ նշելով, որ մինչև նոր սպառազինությունների ստեղծումը արտասահմանյան գործընկերները չէին ցանկանում Ռուսաստանի հետ բովանդակային երկխոսություն վարել։

Ավելի վաղ Ռուսաստանի պաշտպանության նախարարությունը հայտնել էր, որ գիշերային զանգվածային հարվածների ընթացքում թիրախավորվել են Կիևում և Կիևի մարզում գտնվող պահեստներն ու լոգիստիկ կենտրոնները, որոնց միջոցով, ըստ գերատեսչության, Ուկրաինայի զինված ուժերը ստանում էին զենք, ռազմական բեռներ և անօդաչու թռչող սարքեր։ Հարվածներ են հասցվել նաև Օդեսայի շրջանում գտնվող նավերին։