2026 թվականին Հայաստանի բուհերում կսովորի ավելի քան 10,9 հազար առաջին կուրսեցի

2026 թվականի բուհական ընդունելության արդյունքներն ամփոփվել են։ Ըստ Գնահատման և թեստավորման կենտրոնի տվյալների՝ այս տարի Հայաստանի պետական և ոչ պետական բուհերում բակալավրի, անընդհատ և ինտեգրված կրթական ծրագրերով առկա ուսուցմամբ կսովորի 10 958 առաջին կուրսեցի։

Ընդունելության հիմնական փուլով բուհեր էին ընդունվել 9885 դիմորդ, իսկ լրացուցիչ փուլով՝ ևս 1073-ը։ Ընդունվածները կազմում են բուհ և մասնագիտություն հայտագրած 15 859 դիմորդների 69,1 տոկոսը։

2026-2027 ուսումնական տարվա համար պետության կողմից հատկացվել էր ընդհանուր 12 720 տեղ, որոնցից համալրվել է 10 958-ը։ Ընդունվածների 96,3 տոկոսը կսովորի պետական, իսկ 3,7 տոկոսը՝ ոչ պետական բուհերում։

ԳԹԿ-ի տվյալներով՝ նախորդ տարիների համեմատ բուհ ընդունվողների թիվը շարունակում է մնալ կայուն։ 2021-2025 թվականներին ընդունվածների թիվը 9700-ից աճել է մինչև շուրջ 10 970, իսկ 2026 թվականին ցուցանիշը պահպանվել է՝ 2021 թվականի համեմատ գրանցելով մոտ 13 տոկոս աճ։

Առավել մեծ թվով ընդունվածներ ունեն Երևանի պետական համալսարանը, Հայաստանի պետական տնտեսագիտական համալսարանը և Հայաստանի ազգային պոլիտեխնիկական համալսարանը։ Ամենապահանջված մասնագիտությունների շարքում շարունակում են մնալ բժշկական, տնտեսագիտական, իրավաբանական և տեխնոլոգիական ուղղությունները։