Հայաստանի կառավարությունը նախատեսում է ներգրավել շուրջ 320 մլն դոլարի նոր վարկային միջոցներ

Հայաստանի կառավարությունը նախատեսում է ներգրավել նոր վարկեր՝ ընդհանուր շուրջ 320 մլն դոլարի չափով։ Համապատասխան նախագծերն ընդգրկված են կառավարության առաջիկա նիստի օրակարգում։

Առաջին վարկային համաձայնագրով նախատեսվում է Ասիական զարգացման բանկից ստանալ 150 մլն դոլարի բյուջետային վարկ։ Այն կտրամադրվի 15 տարի ժամկետով՝ 4.58 տոկոս լողացող տոկոսադրույքով։ Միջոցները նախատեսվում է ուղղել հարկաբյուջետային կառավարման, պետական պարտքի և ֆինանսական ռիսկերի կառավարման համակարգերի ամրապնդմանը, ինչպես նաև ենթակառուցվածքային ներդրումների կայունության բարձրացմանը։

Ծրագրի շրջանակում նախատեսվում է նաև աջակցել պետական արժեթղթերի շուկայի զարգացմանը, ֆինանսական գործիքների և ներդրողների շրջանակի ընդլայնմանը, ինչպես նաև բարձրացնել ընկերությունների թափանցիկությունը։

Երկրորդ համաձայնագիրը նախատեսվում է կնքել Վերակառուցման և զարգացման միջազգային բանկի հետ։ Վարկի ծավալը կազմում է 170 մլն դոլար, որը նախատեսվում է ուղղել ներդրումների խթանմանը, առևտրի ազատականացմանը, մրցակցության զարգացմանը և ավելի կանաչ ու դիմակայուն տնտեսական աճի ապահովմանը։ Վարկի ժամկետը 28 տարի է, տարեկան տոկոսադրույքը՝ 3.9 տոկոս։

Նշվում է, որ 2026 թվականի մարտի վերջի դրությամբ Հայաստանի կառավարության արտաքին պարտքը գերազանցել է 6.7 մլրդ դոլարը։ Կառավարության ներքին և արտաքին պարտքը միասին կազմում է ավելի քան 14.1 մլրդ դոլար, իսկ Կենտրոնական բանկի պարտքը՝ շուրջ 500 մլն դոլար։