Արգենտինայի խորհրդարանում ձևավորվել է Հայաստանի հետ բարեկամության խորհրդարանական խումբ

Արգենտինայի Հանրապետության Պատգամավորների պալատում տեղի է ունեցել Հայաստանի Հանրապետության հետ բարեկամության խորհրդարանական խմբի կազմավորման պաշտոնական արարողությունը։

Միջոցառմանը մասնակցել են խմբի նախագահ, պատգամավոր Մարիա Լուիսա Գոնսալես Էստեվարենան, խմբի անդամները, Պատգամավորների պալատի միջազգային և ինստիտուցիոնալ հարաբերությունների վարչության ներկայացուցիչները, ինչպես նաև Արգենտինայում ՀՀ դեսպան Հովհաննես Վիրաբյանը և դեսպանության երրորդ քարտուղար Ռուզաննա Ազրոյանը։

ՀՀ դեսպանն իր շնորհակալությունն է հայտնել Մարիա Լուիսա Գոնսալես Էստեվարենային՝ խմբի նախագահի պարտականությունները ստանձնելու, ինչպես նաև մյուս պատգամավորներին՝ խմբին անդամակցելու համար։ Նա առանձնահատուկ նշել է նաև խմբի նախկին նախագահ Լիլիա Լեմոյնեի ներդրումը՝ նախորդ տարիներին արդյունավետ համագործակցության համար։

Հանդիպման ընթացքում կողմերը քննարկել են հայ-արգենտինյան միջխորհրդարանական կապերի զարգացման հեռանկարները՝ ընդգծելով խորհրդարանական դիվանագիտության կարևորությունը երկու երկրների հարաբերությունների ամրապնդման գործում։

Կողմերը անդրադարձել են նաև բարեկամության խմբի շրջանակում հետագա համագործակցության ընդլայնման հնարավորություններին, համատեղ ծրագրերին ու նախաձեռնություններին։ Ընդգծվել է Արգենտինայի հայ համայնքի կարևոր դերակատարությունը՝ որպես Հայաստանի և Արգենտինայի միջև բարեկամական կապերի ամրապնդման կամուրջ։

Հանդիպման մասնակիցները վերահաստատել են պատրաստակամությունը շարունակելու համագործակցությունը և նպաստելու երկու երկրների միջև միջխորհրդարանական ու բարեկամական հարաբերությունների խորացմանը։