Լեհաստանում կբացեն Եվրոպայում Աստվածամոր ամենաբարձր արձանը

Լեհաստանի Կույավսկո-Պոմորսկե վոյեվոդության Տորուն քաղաքի մոտակայքում գտնվող Կոնոտոպե փոքրիկ գյուղում ավարտվել է Եվրոպայում Աստվածամոր ամենաբարձր արձանի կառուցումը, հայտնում է Euronews-ը։

55,6 մետր բարձրություն ունեցող հուշարձանի հանդիսավոր բացումը նախատեսված է օգոստոսի 15-ին՝ Հռոմի կաթոլիկ եկեղեցու ամենակարևոր տոներից մեկի՝ Սուրբ Աստվածածնի Վերափոխման օրը: Արձանի օծման արարողությունն ու պատարագը կանցկացնի եպիսկոպոս Կշիշտոֆ Վենտկովսկին:

Այս կառույցն իր բարձրությամբ գերազանցում է նույնիսկ աշխարհի հրաշալիքներից մեկը համարվող Ռիո դե Ժանեյրոյի Հիսուս Քրիստոսի հայտնի արձանը, որի բարձրությունը պատվանդանի հետ միասին կազմում է մոտ 38,5 մետր:

Հիմքի հետ միասին կառույցի բարձրությունը գերազանցում է 98 մետրը:

Կոնոտոպեում արձանի շինարարությունը մեկնարկել է 2025 թվականին՝ քանդակագործ Ադամ Յակուբ Մատեյկովսկու նախագծով, իսկ ֆինանսավորումը որպես «երախտագիտության ընծա» հոգացել են գործարար Ռոման Կարկոսիկն ու նրա կինը՝ Գրաժինան:

Ըստ հաշվարկների՝ աշխատանքների վրա ծախսվել է շուրջ 23 միլիոն եվրո: