Պուտինը թույլ է տվել «Շերեմետևո» օդանավակայանի պետական բաժնեմասի մասնավորեցումը

Ռուսաստանի նախագահ Վլադիմիր Պուտինը ստորագրել է հրամանագիր, որով «Շերեմետևո» օդանավակայանը հանվում է ռազմավարական նշանակության ձեռնարկությունների ցանկից։ Ինչպես գրում է «Վեդոմոստի»-ն, այդ որոշումը հնարավորություն է տալիս ապագայում մասնավորեցնել պետությանը պատկանող բաժնեմասը։

Միաժամանակ հրամանագրով նախատեսվում է, որ կառավարությունը կպահպանի այսպես կոչված «ոսկե բաժնետոմսի» իրավունքը, ինչը պետությանը հատուկ լիազորություններ կտա օդանավակայանի գործունեությանը վերաբերող կարևոր որոշումների ընդունման ժամանակ։ Բացի այդ, բաժնետոմսերի վաճառքի դեպքում պետք է պահպանվեն օդանավակայանի հիմնական գործունեության ուղղությունը և ենթակառուցվածքների հետագա արդիականացման պայմանները։

Փաստաթղթով նաև սահմանվում է, որ օտարերկրյա սեփականատերերը կամ նրանց վերահսկողության տակ գտնվող ընկերությունները չեն կարող ձեռք բերել «Շերեմետևոյի» բաժնետոմսերը։