Բացահայտվել են Գերմանիայի օդանավակայանում անօդաչուի հետ կապված միջադեպի մանրամասները

Bild պարբերականը հայտնում է, որ Լայպցիգի օդանավակայանում հայտնաբերված պայթուցիկով անօդաչու թռչող սարքը շուրջ չորս ժամ մնացել է աննկատ։ Տեսախցիկների տվյալներով՝ այն տեղակայված է եղել ուկրաինական Ան-26 բեռնատար ինքնաթիռի մոտ՝ տեղական ժամանակով մոտ 19:30-ից։

Հաղորդվում է, որ միայն 23:42-ին օդանավակայանի ավտոբուսի վարորդը նկատել է ցածր բարձրությամբ թռչող անօդաչուն և, ըստ Bild-ի, կարողացել է այն վնասազերծել ոտքով հարվածելով։ Միևնույն ժամանակ ZDF-ը, հղում անելով անվտանգության ծառայությունների աղբյուրներին, հայտնել է, որ սարքը համալրված է եղել 5G կապի համակարգով, ինչը, մասնագետների գնահատմամբ, զգալիորեն բարդացնում է դրա հայտնաբերումն ու թույլ է տալիս այն կառավարել նույնիսկ հեռավոր վայրից։

Ավելի վաղ հաղորդվել էր, որ օգոստոսի 5-ի գիշերը Լայպցիգ/Հալե օդանավակայանում հայտնաբերվել էին երկու անհայտ օբյեկտներ, որոնցից մեկը եղել է պայթուցիչով փաթեթ ամրացված անօդաչու թռչող սարք։ Դեպքի պատճառով օդանավակայանի աշխատանքը ժամանակավորապես սահմանափակվել էր։