Հութիները հայտարարել են Եմենում պրոսաուդյան ուժերի ռազմական բազային հարվածելու մասին

Հութիները հրթիռներով և անօդաչուներով հարվածել են Եմենի Մարիբ նահանգում տեղակայված կառավարական ուժերի ռազմական ճամբարին։ Այդ մասին հայտարարել է «Անսար Ալլահ» շարժման ռազմական ներկայացուցիչ Յահյա Սարիան։

Նրա խոսքով՝ հարվածը հասցվել է Սահն ալ-Ջին ճամբարին, որտեղ, ըստ հութիների, կենտրոնացված էին Սաուդյան Արաբիայի աջակցությունը վայելող ուժերի զինծառայողները, զինտեխնիկան և զինամթերքը։ Գործողության ընթացքում կիրառվել են մեծ թվով հրթիռներ և անօդաչու թռչող սարքեր։

Ավելի վաղ Al Arabiya-ն, հղում անելով եմենյան ռազմական աղբյուրներին, հայտնել էր, որ հութիները հրթիռակոծել են Մարիբի բնակելի թաղամասերը և հարվածել ներքին տեղահանվածների ճամբարին, ինչի հետևանքով մի քանի մարդ վիրավորվել է։ Ականատեսների տվյալներով՝ հրթիռներն արձակվել են հութիների վերահսկողության տակ գտնվող Սանայից։

Aden al-Ghad լրատվական կայքի փոխանցմամբ՝ Եմենի հակաօդային պաշտպանության ուժերը խոցել են Մարիբի ուղղությամբ արձակված հութիների մեկ անօդաչու թռչող սարք։ Իսկ Al-Mashhad al-Yemeni-ի տեղեկություններով՝ օգոստոսի 7-ի առավոտյան հութիները քաղաքի ուղղությամբ կիրառել են նաև բալիստիկ հրթիռներ և անօդաչուներ։

Կառավարական ուժերի միացյալ օպերատիվ հրամանատարության տվյալներով՝ Մարիբ և Հադրամաութ նահանգներում բանակի դիրքերի վրա իրականացված հարձակումների հետևանքով զոհվել է 17 զինծառայող, ևս մի քանիսը վիրավորվել են։

Օգոստոսի 6-ին հութիները զանգվածային հարվածներ էին հասցրել երկրի արևելքում գտնվող ռազմական ճամբարներին, ինչի հետևանքով, Al Hadath հեռուստաալիքի տվյալներով, զոհվել էր առնվազն 45 եմենցի զինվորական։ Նույն օրը հարձակման էր ենթարկվել նաև Սաուդյան Արաբիայի Նաջրան քաղաքը, որտեղ վիրավորվել էր 11 խաղաղ բնակիչ։