ԱՀԿ-ն հետևում է Եվրոպայում տզերի տարածմանը ԱՄՆ-ում բուրբոն վիրուսի հայտնաբերումից հետո

Առողջապահության համաշխարհային կազմակերպությունը (ԱՀԿ) հետևում է Եվրոպայում տզերի տարածմանը՝ ԱՄՆ-ում տզերի միջոցով տարածվող բուրբոն վիրուսի հայտնաբերումից հետո, ՌԻԱ Նովոստիին հայտնել են կազմակերպության ռուսական գրասենյակից։

Բուրբոն վիրուսը մինչ այժմ հայտնաբերվել է միայն ԱՄՆ-ում. ներկայումս չկան ապացույցներ, որ վիրուսը անմիջական հանրային առողջության սպառնալիք է ներկայացնում այլ երկրներում, նշել է կազմակերպությունը։

«ԱՀԿ-ն և գործընկեր համաճարակաբանական հսկողության ցանցերը, այդ թվում՝ ազգային առողջապահական մարմինները և Հիվանդությունների կանխարգելման և վերահսկման եվրոպական կենտրոնը, շարունակում են հետևել Եվրոպական տարածաշրջանում տզերի միջոցով փոխանցվող հարուցիչներին՝ ներառյալ տզերի տեսակների բաշխման ցանկացած փոփոխություն, որը կարող է ժամանակի ընթացքում փոխել այս պատկերը», - ՌԻԱ Նովոստիին հայտնել են ԱՀԿ-ի ռուսական գրասենյակից։