Սարյան փողոցում 74-ամյա կնոջ բնակարանից գողացել են 165 հազար դոլարի ոսկի և 10 հազար դոլար

Օգոստոսի 3-ին Երևանում բնակարանային գողության դեպք է տեղի ունեցել։ Տուժողը արտերկրից Հայաստան էր վերադարձել՝ այստեղ բնակություն հաստատելու նպատակով։

Երևանի Սարյան փողոցի բնակիչ 74-ամյա Անգելինա Ա.-ն ահազանգել է 112 օպերատիվ կառավարման կենտրոն և հայտնել, որ տուն վերադառնալիս հայտնաբերել է բնակարանի վնասված դռան փականն ու ամբողջությամբ տակնուվրա արված բնակարանը։

Ըստ հաղորդման՝ նույն օրը՝ ժամը 10:30-ից 13:00-ն ընկած ժամանակահատվածում, անհայտ անձը կամ անձինք տեխնիկական միջոցների գործադրմամբ բացել են բնակարանի մուտքի դուռը, ներս մտել և ննջասենյակում գտնվող չհրկիզվող պահարանից հափշտակել անձնագրեր, սեփականության վկայական, ոսկյա զարդեր և գումար։

Ֆոտոլրագրող Գագիկ Շամշյանի տեղեկություններով՝ բնակարանից հափշտակվել է մոտ 165 հազար ԱՄՆ դոլար արժողությամբ ոսկյա զարդեր և 10 հազար ԱՄՆ դոլար։

Դեպքի առթիվ նախաձեռնվել է քրեական վարույթ։ Իրավապահները պարզում են գողության հանգամանքներն ու հանցագործությունը կատարած անձի կամ անձանց ինքնությունը։ Տուժողը իրավապահներին հայտնել է նաև, որ հարակից տարածքում տեսախցիկներ կան, որոնց ուսումնասիրությունը կարող է օգնել բացահայտել դեպքը։