Ի՞նչ է Patriot հրթիռային համակարգը և ինչու են դրա պաշարները սպառվում ամբողջ աշխարհում

Ամերիկյան Patriot հակաօդային պաշտպանության համակարգի պահանջարկն այս տարի կտրուկ աճել է, իսկ հրթիռ-կալանիչների պաշարները զգալիորեն նվազել են Ուկրաինայում պատերազմի և Մերձավոր Արևելքում ընդլայնված հակամարտության պատճառով, հայտնում է Reuters-ը։ Ուկրաինան լրացուցիչ Patriot հրթիռների կարիք ունի ռուսական բալիստիկ հրթիռների հարվածներից պաշտպանվելու համար, սակայն Իրանի հետ պատերազմը նվազեցրել է ԱՄՆ-ի և Պարսից ծոցի երկրների պաշարները, իսկ եվրոպական որոշ երկրներ պահպանում են իրենց հրթիռները սեփական պաշտպանության համար։

Patriot-ը շարժական «երկիր-օդ» դասի հակահրթիռային պաշտպանության համակարգ է, որը մշակվել է 1980-ականներին և առաջին անգամ կիրառվել 1991 թվականի Պարսից ծոցի պատերազմի ժամանակ։ Համակարգը կարող է խոցել ինքնաթիռներ, թևավոր և մարտավարական բալիստիկ հրթիռներ։ Դրա ռադարի գործողության հեռահարությունը գերազանցում է 150 կմ-ը, և այն կարող է միաժամանակ հետևել մինչև 100 հավանական թիրախի։ Patriot համակարգը ներկայում շահագործում է 19 երկիր, այդ թվում՝ ԱՄՆ-ը, Գերմանիան, Լեհաստանը, Ուկրաինան, Ճապոնիան, Կատարը, Սաուդյան Արաբիան և Եգիպտոսը։

Reuters-ի ներկայացրած CSIS-ի գնահատականներով՝ փետրվարից հուլիս ԱՄՆ-ն օգտագործել է Patriot հրթիռ-կալանիչների իր պաշարների մոտ 65 տոկոսը, և շուրջ 2330 հրթիռից մնացել է 850-ից պակաս։ Սաուդյան Արաբիան, իր հերթին, մարտական գործողությունների առաջին 38 օրում օգտագործել է իր 2800 PAC-3 հրթիռների մոտ 86 տոկոսը։ Պաշարները վերականգնելու նպատակով ԱՄՆ-ը հավանություն է տվել Բահրեյնին, Քուվեյթին, Կատարին և ԱՄԷ-ին ընդհանուր 5250 հրթիռ-կալանիչ վաճառելուն։ Բացի այդ, ԱՄՆ բանակը Lockheed Martin-ի հետ կնքել է մինչև 58,6 միլիարդ դոլար արժողությամբ պայմանագիր Patriot-ի հրթիռ-կալանիչների արտադրության համար։