Քաղաքագետը նշել է ԵՄ-ի հետ Հայաստանի մերձեցման հնարավոր հետևանքը

Եվրասիական տնտեսական միության (ԵԱՏՄ) անդամ երկրները կարող են ամրապնդել հարաբերություններն Ադրբեջանի հետ՝ ի պատասխան Եվրամիության հետ Հայաստանի մերձեցման։ Նման կարծիք «Լենտա.ռու»-ի հետ զրույցում հայտնել է ՌԴ ԳԱ Համաշխարհային տնտեսության և միջազգային հարաբերությունների ինստիտուտի գլխավոր գիտաշխատող, պատմական գիտությունների դոկտոր Ալեքսանդր Կռիլովը։

Քաղաքագետի խոսքով՝ ԵԱՏՄ անդամ բոլոր երկրները սերտ հարաբերություններ ունեն Բաքվի հետ և մտադիր են զարգացնել այդ համագործակցությունը։ Նրա գնահատմամբ՝ Երևանի եվրաինտեգրման ձգտումները կարող են հանգեցնել նրան, որ ԵԱՏՄ երկրներն ավելի մեծ ուշադրություն դարձնեն Ադրբեջանի շահերին։

«Հաշվի առնելով Երևանի և Ադրբեջանի միջև առկա խնդիրները՝ այս դաշտում դաշնակիցները կարող են որոշակի դիվանագիտական խաղեր վարել՝ փորձելով լրացուցիչ օգուտներ ստանալ Հայաստանի համար խնդրահարույց հարևան պետության հետ համագործակցությունից»,- ասել է Կռիլովը։

Ավելի վաղ Հայաստանի վարչապետ Նիկոլ Փաշինյանը հայտարարել էր, որ Հայաստանը չի պատրաստվում ինտեգրացիոն միություններին անդամակցության հարցով հանրաքվե անցկացնել։ Միաժամանակ նա նշել էր, որ նման քվեարկության կազմակերպման առանցքային նախապայմանը Եվրամիությանն անդամակցելու վերաբերյալ Երևանի պաշտոնական դիմումն է Բրյուսելին։