ՉԹՕ-ների շուրջ դավադրություն․ ԱՄՆ-ում այլմոլորակային տեխնոլոգիաների ուսումնասիրության համար կարող էր ծախսվել մոտ 1 տրիլիոն դոլար

ԱՄՆ-ում կրկին ակտիվացել են ՉԹՕ-ների և ենթադրյալ այլմոլորակային տեխնոլոգիաների շուրջ քննարկումները։ Ամերիկյան հետախուզության և Պենտագոնի նախկին աշխատակիցները տարիներ շարունակ պնդում են, որ գոյություն են ունեցել գաղտնի ծրագրեր, որոնց շրջանակում ուսումնասիրվել են անհայտ ծագման թռչող օբյեկտներ։ 2025 թվականին թողարկված «The Age of Disclosure» ֆիլմում հնչել է պնդում, որ նման ծրագրերը կարող էին գործել դեռևս 1940-ականներից, իսկ դրանց ֆինանսավորման ընդհանուր ծավալը հասնել մոտ մեկ տրիլիոն դոլարի։

ԱՄՆ հետախուզության նախկին աշխատակից Դևիդ Գրուշը դեռ 2023 թվականին Կոնգրեսում հայտարարել էր, որ կառավարությունը մասնավոր ավիատիեզերական ընկերությունների հետ գաղտնի ուսումնասիրել է ենթադրաբար հայտնաբերված այլմոլորակային սարքեր։ Ավելի ուշ նա նաև պնդել է, որ միլիարդավոր դոլարներ են ուղղվում գաղտնի ծրագրերի՝ Կոնգրեսի վերահսկողությունը շրջանցող մեխանիզմներով։ Միևնույն ժամանակ Գրուշը հրապարակային ապացույցներ չի ներկայացրել, իսկ Պենտագոնը հերքել է այլմոլորակային տեխնոլոգիաների ուսումնասիրման գաղտնի ծրագրերի գոյությունը։

Պենտագոնի AARO ստորաբաժանման նախկին ղեկավար Շոն Քըրքփաթրիքը ևս խոսել է ֆինանսական հնարավոր չարաշահումների մասին, սակայն այլ տեսանկյունից։ Նրա պնդմամբ՝ որոշ ազդեցիկ շրջանակներ կարող էին ՉԹՕ-ների մասին պատմություններն օգտագործել պետական ֆինանսավորում ստանալու համար։ AARO-ի 2024 թվականի զեկույցում նշվում էր, որ այլմոլորակային տեխնոլոգիաների գաղտնի ծրագրերի գոյությունը հաստատող ապացույցներ չեն հայտնաբերվել։

Առանձին ուշադրության է արժանացել նաև «Yankee Blue» անվանումով պատմությունը։ Ըստ նյութի՝ տասնամյակներ շարունակ ԱՄՆ ռազմաօդային ուժերի գաղտնի ստորաբաժանումների որոշ աշխատակիցների ցուցադրվել են կեղծ ՉԹՕ-ների լուսանկարներ և նրանց համոզել են, թե աշխատում են այլմոլորակային տեխնոլոգիաների հետ։ Նպատակը, ըստ ներկայացված տվյալների, եղել է գաղտնի աշխատանքի յուրօրինակ «ընդունելության ծեսը» և ապատեղեկատվությունը։

Ֆինանսական հարցերը, սակայն, շարունակում են մնալ ուշադրության կենտրոնում։ 2025 թվականի դեկտեմբերին ԱՄՆ պաշտպանության նախարարությունը ութերորդ անգամ չի կարողացել հաջողությամբ անցնել աուդիտը։ Բացի այդ, գերատեսչությունը նախկինում հայտնել էր, որ 2017-2024 թվականներին խարդախությունների հետևանքով պաշտպանության բյուջեից կորել է մոտ 10,8 միլիարդ դոլար։ Թեև որևէ ապացույց չկա, որ այդ գումարները կապված են ՉԹՕ-ների ուսումնասիրության հետ, ԱՄՆ-ում շարունակվում են քննարկումները գաղտնի ծրագրերի ֆինանսավորման և դրանց նկատմամբ վերահսկողության վերաբերյալ։