Ո՛չ ուսուցչի փոխարեն. բացահայտվել է ռոբոտների իդեալական դերը դպրոցում

Պիլոտային հետազոտության ընթացքում Pepper մարդանման ռոբոտն ուսումնական առաջադրանքներ կատարելիս մասնակիցների մոտիվացիան բարձրացնելու հարցում ավելի արդյունավետ է եղել, քան մարդը։ Հետազոտողների կարծիքով՝ ապագայում նման ռոբոտները կկարողանան իրենց վրա վերցնել ուսուցիչների պարտականությունների մի մասը, թեև ամբողջությամբ փոխարինել նրանց չեն կարող։

Հետազոտության արդյունքները հրապարակվել են Lecture Notes in Computer Science շարքում։

Փորձին մասնակցել են 16-40 տարեկան 15 կամավորներ։ Նրանց առաջարկվել է սահմանափակ ժամանակում պատկերների վրա գտնել տրված առարկաները, ընթացքում նրանք ստացել են դրական, չեզոք կամ բացասական մեկնաբանություններ կամ Pepper ռոբոտից, կամ մարդուց։ Միաժամանակ, աչքերի շարժումներին հետևող հատուկ համակարգը գրանցել է ուշադրությունը, ներգրավվածության մակարդակը և այլ ցուցանիշներ։

Վերլուծությունը ցույց է տվել, որ ռոբոտի տված հետադարձ կապը մասնակիցների կենտրոնացման վրա ավելի ուժեղ ազդեցություն է ունեցել, քան մարդու մեկնաբանությունները։ Միջին հաշվով փորձարկվողները նաև փոքր-ինչ ավելի լավ են կատարել առաջադրանքները, երբ խորհուրդները տվել է Pepper-ը։ Բացառություն են կազմել այն դեպքերը, երբ փորձն ավարտվել է բացասական գնահատականով․ այդ դեպքում ռոբոտի առավելությունը վերացել է։

Հետազոտողները խոստովանել են, որ սպասում էին հակառակ արդյունքի, քանի որ մարդիկ սովորաբար ավելի շատ են վստահում այլ մարդկանց, քան մեքենաներին։ Սակայն, նրանց կարծիքով, մասնակիցները կարող էին ավելի հարմարավետ զգալ, երբ հետադարձ կապը ստանում էին ռոբոտից, ոչ թե մարդուց։

Հեղինակներն ընդգծել են, որ սոցիալական ռոբոտները չպետք է փոխարինեն դասավանդողներին։ Դրանք դիտարկվում են որպես գործիք, որը կարող է օգնել անհատական ուսուցման մեջ, պահպանել աշակերտների մոտիվացիան և նվազեցնել մանկավարժների ծանրաբեռնվածությունը։ Կրթության մեջ արհեստական բանականության օգտագործման հետ կապված բոլոր որոշումները նախկինի պես պետք է մնան մարդու վերահսկողության ներքո։