Մոսկվայում խարդախության գործով կալանավորել են դրոններ արտադրող ընկերության նախկին և գործող ղեկավարներին

Մոսկվայի Կուզմինսկի շրջանային դատարանը օգոստոսի 8-ին կալանավորել է «Դրոն Սոլյուշնս» ընկերության գործող և նախկին գլխավոր տնօրեններ Վյաչեսլավ Բարբասովին և Իրակլի Խազալիային, հաղորդում է «Коммерсантъ»-ը։

Նրանց մեղադրանք է առաջադրվել առանձնապես խոշոր չափերի խարդախության համար՝ ՌԴ Քրեական օրենսգրքի 159-րդ հոդվածի 4-րդ մասով, որը նախատեսում է մինչև 10 տարվա ազատազրկում։ Այդ մասին նշվում է դատարանի նյութերում։

Քրեական գործի էությունը իրավապահ մարմինները առայժմ չեն բացահայտում։

«Դրոն Սոլյուշնս» ընկերությունը, որը գրանցվել է Մոսկվայում 2018 թվականի փետրվարին, զբաղվում է բնական և տեխնիկական գիտությունների ոլորտում հետազոտություններով և մշակումներով։ Ընկերության կայքում տեղադրված տեղեկատվության համաձայն, այն արտադրում է անօդաչու ավիացիոն համակարգեր, դրանց համար ծրագրային ապահովում, ինչպես նաև նեյրոցանցերի հիման վրա աշխատող համակարգչային տեսողության համակարգեր։

Մշակողը հայտարարում է, որ իր անօդաչու սարքերը կարող են գործել գրեթե ցանկացած կլիմայական պայմաններում։ Դրանց կիրառման հիմնական ոլորտների թվում ընկերությունը նշում է նավթագազային ենթակառուցվածքների մոնիտորինգը, հրդեհների օջախների վերահսկումը և օբյեկտների պարագծի պահպանությունը։

Բաց աղբյուրների տվյալներով, ընկերության շուրջ 40%-ը պատկանում է Վյաչեսլավ Բարբասովին, ևս մոտ 23%-ը՝ Ազգային տեխնոլոգիական նախաձեռնության նախագծերի աջակցության հիմնադրամին։ Իրակլի Խազալիան ունի փոքր բաժնեմաս։